د امریکا او طالبانو تر منځ د سولې خبرې او د تاوتریخوالي پر کمولو خبرې وروستۍ شوې ښکاري. ځیني رسنۍ وايي چې د فبرورۍ په ۲۲مه به د تاوتریخوالي د کمولو اووه ورځنۍ مرحله پیل شي او د همدې میاشتې په ۲۹مه به د امریکا او طالبانو تر منځ د سولې هوکړه لیک هم لاسلیک شي. د امریکايي چارواکو په حواله هم دا خبره شوې چې پر هر څه توافق شوی او د تاوتریخوالي د کمولو د مرحلې بریالي پای ته رسېدل به د سولې هوکړه لیک لاسلیک ته لاره هواره کړي.
ټاکل شوې چې د دې هوکړه لیک له لاسلیک وروسته به په جرمني کې رسمي بین الافغاني غونډه وشي او په دې سره به د افغانانو تر منځ د راتلونکي نظام، اساسي قانون او نورو مسایلو په اړه رسمي بحث پیل شي. په کابل کې چارواکو که څه هم د امریکا له خوا معلومات او پیغامونه تر لاسه کړي، خو دوی داسې ګامونه نه اخلي چې ګواکې د سولې لور ته روان دي. دوی د تاوتریخوالي د کمولو لپاره له خپله اړخه د کوم پلان او پروګرام خبره نه کوي او آن لا هم نظامي عملیات کوي. تر دې چې بیا بیا ملکي وګړي وژني. همدا وړمه ورځ یې په ننګرهار کې نهه بې ګناه وګړي وژلي دي. له دې ښکاري چې دلته نه یوازې د سولې له پرمختګونو سره کومه همغږي نشته، بلکې تخریبي هڅې هم شته. د ملکي وګړو دا ډول قصدي وژل او بیا یې پر وړاندې داسې بې توپیره پاتې کېدل، یوازې د وحشت زیاتولو او د سولې فضا د خرابولو یوه هڅه ده.
د دې تر څنګ، بین الافغاني خبرو ته کم وخت پاتې دی، نو باید له دې اړخه پلاوی وټاکل شي او خلک پرې خبر کړل شي. که څه هم حکومت پخوا ویلي چې کار یې کړی، خو داسې ښکاري چې یا پلاوی ټاکل شوی نه دی او یا هم داسې پلاوی ټاکل شوی چې د لا زیات نفاق، لانجې او د سولې د خبرو د ځنډ سبب شي. د سولې دا پلاوی باید یوازې حکومتي نه وي، بلکې د سیاسي ګوندونو، مدنې ټولنې، ښځو او نورو اړخونو استازي هم پکې وي. لومړی خپله حکومت دوې برخې دی، چې د ډاکټر عبدالله برخه له دې پلاوي خبره نه ده. له بله اړخه سیاستوال، سیاسي ګوندونه او مدني ټولنې بیا بیا وايي چې دوی له دې پلاوي خبر نه دي. اوس نو ارګ څوک، څه ډول او له چا سره په مشوره ټاکلي دي؟!
د ارګ له دریځونو او کړنو لا هم د سولې ضد دریځ بوی راځي. دا دریځ ښايي د شخصي ګټو لپاره خپله د ارګ د واکمنانو وي او یا هم ښايي امریکايي یا کوم بل اړخ ورته د داسې دریځ نیولو ویل شوي وي، څو هغوی د خپلو ګټو لپاره ترې استفاده وکړي. دا چې دغه دریځ پر هر اساس دی، خو د سولې ضد او د افغانستان د خلکو د هیلو او غوښتنو ضد دریځ دی. دا له ولس، سولې او ارامۍ سره ښکاره دښمني ده چې د ارګ واکمنان یې کوي. دوی باید پوه شي چې حالت حتمي بدلیږي او سوله به راځي، خو دوی به د خپلو هغو کړنو بیه حتمي پرې کوي، چې له امله یې ولس زیانمن شوی دی.
