پرون په ارګ او سپېدار ماڼیو کې د لوړې مراسم روان وو. محمد اشرف غني چې د ټاکنو کمېسیون ولسمشر اعلان کړی، د لوړې مراسم یې تر سره کړل، چې د ځینو هېوادونو سفیران هم ورغلي وو. ډاکټر عبدالله چې د ټاکنو کمېسیون پایلې نه مني، هم د ټول شموله حکومت د مشر په توګه یې لوړه وکړه. دواړه لوړې له هغه وروسته هممهاله وشوې چې د سیاسي جوړجاړي لپاره هڅې بې پایلې پای ته ورسېدلې.
له دې سره اوس پوښتنه دا ده چې له ټاکنو را ولاړه شوې لانجه حل شوه او که لا پېچلې شوې ده؟
د لوړې دواړه مراسم پرون د شرم او ننګ یوه ډرامه وه، چې هر افغان یې په لیدلو د شرم احساس کاوه. له بده مرغه دواړو لورو په ټوله سپین سترګۍ د خلکو د خوښې، ارادې او غوښتنې خلاف د خپل واک او ځواک لپاره د افغانستان شرمولو لوبه روانه کړې ده. دوی دواړه د افغانستان د ګټو او ارزښتونو پر ځای د خپلو شخصي ګټو او واک لپاره هلې ځلې کوي چې له همدې امله لانجه زیاتیږي. اوس چې دوی دواړو لوړه کړې، نو ورسره نه یوازې لانجه حل شوې نه ده، بلکې لا زیاته او پېچلې شوې ده. دا سمه ده چې د ډاکټر عبدالله موقف کمزوری دی او د لوړې مراسمو ته یې بهرنیان هم نه وو ورغلي، خو په کور د ننه هم لویه برخه سیاستوال له اشرف غني سره ستونزه لري او د لوړې مراسمو ته یې نه وو ورغلي. ډاکټر عبدالله به ونه شي کولی چې په کابل کې عملي کارونه وکړي، څوک واک ته ورسوي او عملي چارې په لاس کې واخلي، خو په ځینو ولایتونو کې یې مخکې له مخکې دا کار کړی او په ځینو نورو کې هم همدا کار کولی شي. اوس که د دغو کارونو پر ضد ګام اخیستل کېږي او امنیتي ځواکونه کارول کېږي، نو لانجه لا زیاتیږي، خو که یې پر ضد ګام نه اخیستل کېږي، نو دا هم یوه جدي ستونزه ده او په یو ډول د افغانستان په یوه برخه کې د ډاکټر عبدالله واکمني منل کېږي.
راتلونکې ورځې به له لا زیاتو لانجو او ننګونو ډکې وي، چې زیان به یې بیا هم افغانستان او افغانانو ته اوړي. له دې سره به یوه جدي ستونزه دا هم وي چې د سولې په خبرو کې به هم ستونزې پیدا کېږي. که دواړه لوري خپل ضد ته همداسې دوام ورکړي، موږ به له لا زیات ناوړه حالت سره مخ شو. د دې شونتیا زیاته ده چې ځیني ولایتونه یو ډول له مرکزي حکومت څخه خپلسري پیدا کړي او یا یې هم اړیکه پرې شي، په دې سره به افغانستان له خورا جدي ګواښ سره مخ شي. له همدې امله دواړه لوري باید خپل ضد پرېږدي او د افغانستان د سلامت په اړه فکر وکړي. اوس پکار ده چې دواړه لوري یو جوړجاړی وکړي، ځکه چې هسې هم باید د سولې لپاره د اوسني حکومت پر ځای یو لنډمهالی حکومت جوړ شي. همدا دوی به حتمي له خپل واک څخه تېریږي، نو پکار ده چې د افغانستان لپاره سر له اوسه مصلحت وکړي او په یو ډول سره جوړ شي.
