داسې څوک به پیدا نه شي چې ورته ووايي چې تاته به معلوم نه وو، ولې چې په همدې مرکه کې دې ویلي چې پس له ۲۴ کلونو هېواد ته راستون شوی وې او لکه ستا د کابینې د یو شمېر چارواکو له کور دننه حالاتو خبر نه وې، د لوکل آفګنز(سیمه ییزو افغانانو) په اړه دې معلومات ناسم وو!
ولسمشره! هغه ۲۴ کاله چې تا یاد کړي، هغه مهال او له هغې د مخه افغانانو په لوږه، تنده، د راکېټ ګولۍ او کلاشینکوف شپېلۍ مخې ته د مرګ په کومي کې هم قلم پاللو او هم یې کتاب ساتلو. نیمه ورځ به یې مزدوري کوله، د سړک په غاړه به یې درانه کارونه کول او نیمه ورځ به یې زدکړې کولې. دلته د حکومت په نه شتون کې سلګونو افغانانو د موسساتو په اډانه کې د همدې نیم او نیم کله تعلیم په مرسته د بې وزله ولس چوپړ کولو، د حکومت تشه یې ډکه کړې وه. دلته غلام فاروق وردګ چې له تاسره ناست دی او غلام فاروق صافي چې زه ورسره کېنم، غربي متخصصین د دوی د وړتیا په اعتراف په احترام ودرېدو ته مجبوره کړي وو. له معصوم ستانکزي پوښتنه وکړه، له حنیف اتمر پوښتنه وکړه، حال به درته ووايي!
جلالتماب ولسمشره! تا د شاعرانو خبره کړې، راځه چې ستا د مبالغې په مقابل کې ګستاخي وکړم او لږه مبالغه وکړم. تا ویلي چې له نن څخه ۱۹ کاله مخکې دلته پرته له یوه کس بل شاعر نه و. واوره! له نن نه ۱۹ کاله مخکې د نیوز انټرنېشنل ورځپاڼې د یکشنبې په پاڼو به زما په انګریزي ژبه شعرونه خپرېدل. ته وایې، له نن نه ۱۹ کاله مخکې پښتو کې شاعر نه و، زه درته وایم چې له نن څخه ۱۹ کاله مخکې سلګونو افغانانو د پښتو ادب ډېوه په سوال او خیرات بله ساتله او زرګونه ځوانان یې د روزنې لاندې نیولي وو. یو شمېر هغه مشران نن تاته د افغاني، پښتو ادب او کلتور په اړه مشورې درکوي، ستا په شان د یوه مفکر سلاکاران دي!
ولسمشره! دلته لکونو ځوانانو پرته له دې چې پوه شي چې دا لوړې زده کړې به ورته ګټه وکړي کنه، د غربت او بدمرغۍ په تیارو کې د علم مشال روښانه ساتلی و. موږ هغه خلک یو چې د تهرډ کلاس پوهنتونونو نه مو ورلډ کلاس کادرونه تولید کړي. آن که ستا په پیمانه یې درسره اندازه کړم او انګریزي معیار وګرځوم، نو همدې خړو پړو افغانانو په همدې خړ پړ وطن کې له نن څخه ۱۹ کاله مخکې ستا د ویرجینیا او نیویارک مېشتو په اېکسنټ یا ګړدود انګریزي ویل زده ول!
لطفاً د خپلې ناخبرۍ له کبله د دې وطن د زیارکښو پلرونو او میندو زیار او زحمت ته او زما په شان یتیمانو ته سپکاوی مه کوئ! موږ ۲۵ کاله مخکې هم سلګونه او زرګونه لوستي، بلکې ورلډ کلاس لوستي خلک درلودل او ۱۹ کاله مخکې هم او که بېخي معیار تیټ کړم، نو ستا د تېرې او اوسنۍ کابینې د بعضو وزیرانو په سویه خو مو بېخي ډېر کسان درلودل… .
وروستۍ خبره!
که دا هم درسره ومنم چې پس له ۱۹ کلونو مو لوستي خلک پیدا کړي، نو یوه مهرباني وکړئ، د دغه پرمختګ کرېډېټ ځان ته مه کشوئ. د دغه پرمختګ کرېډېټ لومړی ورلډ بېنک، یواېس اېډ، یو اېن، موسساتو، چیوننګ، ډآډ او فولبرایټ ته ځي او بیا پخواني ولسمشر کرزي ته. د کرېډېټ په ځای له دغه خلکو مننه وکړئ چې د حکومت چلولو لپاره یې خلک درته چمتو کړي… .
