ډېری کسان د خپلو تېرو شوو محدودیتونو او ماتو په اړه تصور کوي او هغه د ځان لپاره په وار وار تکراروي. نوښتګره تصویرجوړونه تاسې پر دې برلاسي کوي، څو د ژوند په اړه یو داسې لرلید ولری چې هغه ستاسې په ذهن کې تعریف شوی وي او ټول ژوند مو راتلونکي ته متمایل کړي، هغه راتلونکی چې هېڅ محدودیت نه لري.
دلته مو په لڼد ډول د تصویر جوړونې ډول ته اشاره کړې ده او پر هغه پسې جوخت مو هغه درې ګامونه تاسې ته معرفي کړي، چې له هغه په استفادې سره کولای شی د خپل ځان او ژوند په اړه ښه تصویر ولری. له هغه وروسته مو چې د خپل ځان لپاره مثبتې جملې او مثبت باورونه تکرار کړل، په خپله خونه کې پر اېښي کټ کېناستم، سترګې مې بندې کړې او څو ځله مې ژوره ساه واخیسته. پنځه دقیقې مې د خپل ایډیال ژوند په اړه تصور وکړ، په داسې ډول چې ټول کارونه مې په راحتۍ، پر ځان د پوره باور او مینې له مخې سر ته رسول.
د بېلګې په ډول، د دغه مقالې د لیکلو پر مهال مې داسې تصور کړی و، چې زه یې د لیکلو پر مهال ډېر ارام یم، له خپله کاره خوند اخلم او له خپلو ټولو سټریسونو او وېرو لرې یم. همداسې مې د دغه مقالې پایله هم همداسې تصور کړې وه چې تر لیکلو او خپرولو وروسته به یې ډېر خلک ولولي، له هغه سره به مینه ښيي او خپلو نږدې ملګرو ته به د هغه د لوستو سپارښتنه کوي. له وېرې او سټریس لرې دې تصویر جوړونې بالاخره زه دې ته چمتو کړم چې پرته له کومې ستونزې د دغه مقالې پر لیکلو شروع وکړم.
د تصویر جوړونې لپاره درې ساده ګامونه
دا چې تاسې خپل باورونه لوستي، همدا ستاسې د لا ښه څرګندېدو لپاره تر ټولو ښه وخت دی، چې د هغه پر اساس کولای شی خپل ژوند برابر کړی.
لومړی ګام: اماده اوسئ
ډېری کسان دا خوښوي چې د تصویر جوړونې پر مهال د خپلې خوښې موسیقي له اورېدو هم خوند واخلي. د بېلګې په ډول، کلاسیکه موسیقي هغه چا ته د تصویر جوړونې پر مهال ښه بګراونډ برابروي، چې هغوی کلاسیکه موسیقي اوري یا یې خوښېږي. که تاسې هم غواړی چې د تصویر جوړونې پر مهال د خپلې خوښې موسیقي واوری، ښه ده چې اواز یې ډېر ټيټ کړئ.
اوس په ښه ډول کېنئ، داسې چې ټول بدن مو راحت وي. کولای شی د راحت کېناستلو لپاره د خوب خونې پر غولي او یا هم پر څوکۍ او که تاسې د تصویر جوړونې پر مهال په قدم وهلو کې راحت یاستی، کولای شی قدم ووهئ. ژوره ساه واخلئ، سترګې مو یوڅو دقیقې بندې کړئ، ذهن مو ارام کړئ او په هر لحاظ ځان د تصویر جوړونې لپاره اماده کړئ.
دویم ګام: هغه څه چې غواړی، تصور یې کړئ
ډېری کسان د بریا په تصور کولو سره د ناراحتۍ احساس کوي او حتی له بریا وېرېږي. ممکن یوڅه کسان بیا په دې برخه کې یوڅه مقاومت وکړي، ځینې نور چې بیا د ټولنې ۹۵ سلنه تشکیلوي، له دې امله د ګناه احساس کوي.
د ماریانا ویلیا مسون دغه مشهوره سپارښتنه کېدای شي له هغو کسانو سره یوڅه مرسته وکړي، چې د تصویر جوړونې پر مهال له ذهني او عاطفي ستونزو سره مخ کېږي: «زموږ لویه وېره له نابودوالي نه ده، بلکې زموږ لویه وېره له دې ده چې موږ له اندازې زیات پياوړي یاستو. دا زموږ دروني غږ دی چې موږ وېروي. موږ له ځانه پوښتو: زه څوک یم چې د هوښیارۍ دعوې کوم؟ زه څوک یم چې غواړم جذاب، بااستعداده او باانګېزه و اوسم؟ تاسې باید دا ووایئ: ولې نه شی کولای چې دا ټولې ځانګړنې خپلې کړم؟ تاسې د پاک خدای بنده یاستی، دا چې تاسې خپله خپل ځان ته په کوچنیوالي قایل یاستی، دا به ستاسې په ګډون له هېچا سره مرسته ونه کړي. په دې کې هېڅ مثبته انګېزه نشته چې تاسې خپل ځان کم یا نابود تصور کړی، څو مو شاوخوا خلک د وېرې او ناامنۍ احساس ونه کړي.
موږ ټول د ښه ځلېدو لپاره پيدا شوي یاستو، موږ دې دنیا ته د دې لپاره رالېږل شوي یو، څو له هغو وړتیاوو ګټه واخلو چې خدای پاک موږ ته راکړې دي او هغه مسوولیت ادا کړو چې موږ یې د سرته رسولو لپاره پيدا شوي یو. دا فکر مه کوئ چې خدای پاک یوازې ځینو کسانو ته دا وړتیا ورکړې ده، بلکې موږ ټولو ته یې دا توانايي راکړې ده. کله چې موږ خپل ځان ته د ښه ځلېدو اجازه ورکړو، هغه ده چې خپل شاوخوا کسانو ته هم دا فرصت برابروو چې هغوی هم په ښه ډول راڅرګند شي. کله چې موږ خپل ځان له دروني وېرو خلاص کړو، هغه ده چې موږ خپله شاوخوا هم په مستقیم ډول له هغه خلاصوو.»
تر ټولو ښه ډالۍ چې خپلو نږدې ملګرو ته یې ورکولای شم دا ده چې موږ ټول کولای شو له خپلو وړتیاوو ښه استفاده وکړو. تاسې څه وایئ؟ تاسې په رښتیا څه غواړی؟ د محدودیتونو منطق مو نور هېر کړئ. که وشی کولای هغه څه ولری چې تاسې یې غواړی، هر کار چې غواړی سرته یې ورسوی او پر خپل ایډیال کس بدل شی، څه څه به غواړی؟ کوم کارونه به سر ته رسوی؟ کوم کس جوړېدل به غواړی؟
لوی هدفونه، لویې غوښتنې چې هغه ته په رسېدو مو ژوند بدلېږي، تصور کړئ. د دغه تجسم یا تصور کوچني جزیات هم مشاهده کړئ، احساس یې کړئ، وا یې ورئ، لمس یې کړئ، وې څکئ او بوی یې کړئ. د دغه کار د ښه تر سره کولو لپاره له ټولو حواسو په ښه ډول استفاده وکړئ. هرڅومره چې ستاسې لرلید واضح وي، هغومره باوري کېږی څو د هغه پر واقعیت بدلولو لپاره لازم کارونه وکړئ. تاسې کولای شی یا خپله نږدې او یا هم خپله لرې راتلونکې په ذهن کې تصور کړئ. کټ مټ زما په څېر، ما چې کله دا مقاله او دېته ورته یو کتاب لیکلو، داسې فکر مې کاوه چې تر لیکلو او چاپ وروسته به یې ډېر خلک لولي، له هغه سره به مینه ښيي او خپلو نږدې دوستانو او ملګرو ته به د هغه د ویلو سپارښتنه کوي. دا هغه وخت و څو هغه څه ته ځان ورسوی چې د زړه په مینه یې غواړی. ښه ده چې مخکې له مخکې هغه تصور کړئ، د هغه د لرلو احساس وکړئ او هرڅه یوځل په ذهن کې تجربه کړئ.
درېیم ګام: هغه شخص چې تاسې باید شی او هغه کارونه چې تاسې یې باید وکړی، تصور کړئ
کله مو چې د هغه څه په اړه چې تاسې یې غواړی، په خپل ذهن کې یو شفاف تصویر و ایست، وروسته خپل ژوند پر هغه مسیر برابر تصور کړئ چې تاسې ورته رسېدل غواړی. خپل ځان مو د هغو فعالیتونو په ښه تر سره کولو کې تصور کړئ، چې تاسې یې هره ورځ سر ته رسوی؛ تمرین کول، مطالعه کول، کار کول، لیکل، اړیکې پالل، ایمیل لېږل او یا هم دې ته ورته نور کارونه. باوري اوسئ چې د یوې داسې صحنې له تصور کولو خوند اخلی.
خپل ځان داسې تصور کړئ چې د منډې وهلو او شخصي نظم له امله چې تاسې رامنځ ته کړی، تاسې یو ډول د غرور احساس کوی. ځان مو داسې تصور کړئ چې تاسې په ښه ډول خپلې کاري اړیکې تنظیموی. د خپل کار راپورونه مو چمتو کړي دي او یا مو هم هغه پروژه سر ته رسولې چې له ډېره وخته مو تعقیبوله. داسې تصور وکړئ چې همکاران، کورنۍ، مشتریان، ملګري او د ګډ ژوند ملګری مو ستاسې د مثبت چلند په اړه یو عکس العمل ښکاره کوي.
