«د سهار وختي پاڅېدو معجزې فوق العاده دي. هغه زما په حق کې د دې باعت شوې چې زه په ژوند کې د پوره انرژۍ او تمرکز تر ټولو لوړې سطحې ته ورسېږم. جالبه پکې دا ده چې هر فرد کولای شي خپلو موخو او وخت ته په کتو سره د هغه لپاره متفاوته برنامه ولري. زما لپاره د یو وړوکي کسب وکار د څښتن او یو کلن ماشوم د مور په حیث، سهار وختي پاڅېدل د مراقبې کولو، دعا کولو، پر خپلو موخو او غوښتنو تمرکز کولو او سټریس کمولو لپاره تر ټولو ښه وخت دی. زه دا وخت د خپلو ټولو شته څیزونو له امله د خدای شکر هم په ښه ډول پر ځای کوم. موږ هر یو په اونۍ کې ۱۶۸ ساعته وخت لرو، نو ښه ده چې د سهار وختي پاڅېدو لپاره همدا اوس خپل پلان جوړ کړی، څو مو په ژوند کې هغه معجزې رامنځ ته کړی چې تر اوسه مو یې په اړه هېڅ فکر نه کاوه.» کتي هیني
ټول څیزونه له خوبه د راپاڅېدلو له وخته تر هغه وخته چې ستاسې د سهار وختي پاڅېدو برنامه وخت نیسي، څو هغه فعالیتونه چې سر ته یې رسوی او همدارنګه د دغو فعالیتونو د وخت ترتیب، ټول کولای شو خپلو لومړیتوبونو ته په کتو سره تنظیم کړو. د سهار وختي پاڅېدو او ستاسې د ژوند د سبک د همغږي کولو او ډېر ژر خپلو موخو ته د رسېدو تر منځ هېڅ کوم محدودیت نشته.
موږ په همدې څپرکي کې پر پورتنیو او دې ته ورته نورو موضوعاتو لکه د سهار چای څښلو وخت، له خپلو موخو او غوښتنو سره د سهار وختي پاڅېدو همغږي کول، هغه کارونه چې تاسې یې باید د اونۍ په اخر کې تر سره کړی، پر ټنبلۍ د برلاسي کېدو او پر ډېرو نورو موضوعاتو خبرې کوو.
- له خوبه د راپاڅېدو او کارونو د شروع کولو وخت
ممکن هغه وخت چې غواړم تاسې ته یې ووایم، یوڅه غیر منطقي په نظر درشي، دا هم اجباري نه ده چې تاسې دې د سهار وختي پاڅېدو ټول فعالیتونه حتماً سهار سر ته ورسوی.
رښتیا؟
البته چې سهار وختي پاڅېدل او په فعاله ډول د ورځې پيلول بې شمېره ګټې لري. له دې سره سره، ممکن ځینې کسان په فرد پورې تړلې د شخصي ودې برنامه د سهار پر مهال سمه سر ته ونه رسوي. مسلماً هغه کس چې تر ډېره کار کوي، د سهار پر مهال د پاڅېدو متفاوت عادت ولري. دې موضوع ته په کتو چې هرڅوک د ژوند بېلابېله بڼه لري، د سهار وختي پاڅېدلو حالت چې معمولاً په هر فرد پورې تړلې موضوع ده، د ټولو لپاره یوه ثابته تګلاره ده. نو پر دې اساس کولای شو چې هرڅوک خپلې دندې او کار ته په کتو د شخصي ودې او پرمختګ لپاره وخت ځانګړی کړي.
کوم څه، په کوم وخت کې او ولې د سهار چای پر مهال وخورو؟
ممکن دا پوښتنه درته پيدا شوې وي چې څنګه د سهار وختي پاڅېدو په برنامه کې مو د سهار چای څښلو ته وخت ورکړی او کوم وخت د سهار چای څښلو لپاره مناسب دی؟ موږ پر همدې موضوع دلته خبرې کوو. د سهار چای څښلو پر وخت سربېره، دا چې تاسې څه خوری، دا تر ټولو ډېر ارزښت لري او ممکن د هغه د «ولې» دلیل بیا تر ټولو مهم وي.
کوم وخت د سهار چای وڅښو؟ دا په یاد لرئ چې په ښه ډول د غذا هضمول زموږ د جسمي او ذهني حالت د ښه کنټرول لپاره ډېر مهم دي. هرڅومره چې تاسې پس پس ډوډۍ خوری، هماغه دي چې ستاسې معده بیا په ښه ډول هضم کولای شي او بالاخره د دغه کار پایله به دا شي چې ستاسې د وجود انرژي به هر وخت پوره وي. ځکه دا وخت به یو په یو ستاسې په معده بوج نه وي راغلی او په ښه ډول به هضم کولای شي.
دې موضوع ته په پام سره تاسې ته سپارښتنه کوم چې له سهار وختي پاڅېدو وروسته مو د سهار چای څښلو وخت او خوراک ته ډېر پام وکړئ. په دې کار سره اطمینان حاصلوی چې د دغو فعالیتونو د سر ته رسولو پر مهال ستاسې د وینې فشار مغز ته هدایت کېږي نه خېټې ته او بالاخره تاسې ته مطلوب تمرکز او ارام فکر برابروي.
که داسې احساس کوی چې په هماغه سهار کې باید یوڅه وخوری، هڅه وکړئ چې ډېر کم، نرم او ښه کیفیت لرونکې غذا وخورئ.
ولې یې وخورو؟ اجازه راکړئ چې د ډوډۍ خوړلو د ضرورت په اړه یوڅه خبرې درته وکړم. کله چې تاسې په رسټورانټ کې د مینو له مخې د یوې غذا انتخاب کوی، هغه وخت به د غذا انتخابولو لپاره له کومو معیارونو استفاده کوی؟ ایا ستاسې انتخابونه به یوازې د خوند پر اساس وي؟ ایا د غذا ظاهري بڼې ته په کتو به انتخاب کوی؟ او یا هم دا چې ستاسې انتخاب به روغتیا ته په کتو وي؟ او که انرژۍ ته په کتو؟
ډېری کسان غذا د هغه د خوند پر اساس ټاکي او کله کله دا انتخاب له هغه سره د مینې له امله هم کوي. که له یو چا وپوښتی: «په کوم دلیل معدني اوبه څښې؟» «ولې نوشابه څښې؟» او یا هم «ولې د سور کړی چرګ له رسټورانټه راغوښتی؟» په ډېر زیات احتمال سره چې داسې ځواب به درکړي: «اممم، زه له معدني اوبو سره مینه لرم، ځکه هغه د صحت لپاره ښې دي. ځکه چې زما نوشابه خوښېږي. هسې مې سور کړي چرګ ته زړه وشو.» دا ټول انتخابونه د خوند پر اساس شوي دي. په دې اړه به ډېرو کمو کسانو انتخاب بدن ته د هغه غذا د شته ویټامینونو او یا هم نورو ارزښتونو له مخې وي.
زما منظور دا دی که چېرې موږ غواړو چې ډېره انرژي ولرو او غواړو چې سالم ژوند او ښه روغتیا ولرو، باید همدا اوس په دې اړه ښه ارزونه وکړو چې ولې موږ یوه غذا د غرمې ډوډۍ او یا هم بل وخت خوراک لپاره انتخابوو. دا موضوع ډېر زیات اهمیت لري. هڅه وکړئ چې د غذا انتخابولو پر مهال د هغه له خوند زیات د هغه غذايي ارزښت په پام کې ونیسئ. زه درته دا هېڅکله نه وایم چې تاسې د ښې روغتیا لپاره بې مزې خواړه انتخاب کړی، زما منظور دا دی چې دواړو هم د غذا خوند او هم د بدن لپاره د هغه ارزښت په پام کې ونیسئ. زه له ځان سره وایم، که غواړم چې هره ورځ د پوره انرژي ولرم او په ښه ډول د یو کار تر سره کړای شم او له دې سره سره د ښه روغتیا او اوږد عمر ولرم، باید هغه غذا انتخاب کړم چې هم ښه خوند ولري او هم د بدن لپاره ګټور ویټامین پکې وي.
له کومو غذاوو استفاده وکړو؟ په دې اړه له خبرو کولو مخکې چې څه وخورو، اجازه راکړئ څو په دې اړه درته لږ خبرې وکړم چې کوم څیزونه باید وڅښو. په یاد راوړئ چې له خوبه د راويښېدو د ستراتيژۍ له پنځو مرحلو څلورمه مرحله دا وه چې هر سهار باید تر هرڅه مخکې یو ګیلاس اوبه وڅښئ. څو وشی کولای له یوې پوره شپې خوب وروسته د خپل بدن اوبه پوره کړی او دویم ځل خپله انرژي په لاس راوړی.
له هماغې ورځې وروسته زه هر سهار د یو ګیلاس ښه دم شوي چای په څښلو سره پيلوم او د همدې کار لپاره زه هر سهار د خپل ساعت زنګ ۱۵ دقیقې مخکې برابروم. څو بیا وشم کړای په ښه ډول د ځان لپاره چای دم کړم. که ستاسې قهوه خوښېږي، ارام اوسئ او د ځان لپاره مو یو ګیلاس قهوه جوړه کړئ.
خو د خوراکي څیزونو په اړه بیا له یو ثابت غذايي رژیم لکه تازه میوو، سبزیجاتو، لبنیاتو او کم غوړ لرونکو حبوباتو څخه استفاده وکړئ. څو په دې ډول سره هم د خپل بدن مصرف شوې انرژي بیرته واخلی او هم ښه جسمي او ذهني کنټرول ولری.
دا مهمه نه ده چې تاسې د بل چا د ژوند پروګرام تعقیب کړی، مهمه دا ده چې څنګه او په کومه لاره اسانه او په کم وخت کې ستاسې موخې تر لاسه کېږي. تاسې هماغه لارې چارې انتخاب کړئ چې په اسانه ډول مو خپلو موخو ته رسوي، نه دا چې تاسې د بل تعقیب شوې لار څاری او په پای کې داسې یو ځای ته وځی چې نه مو د موخې درک وي او نه مو هم د خپل ایډیال ژوند کوم څرک لګي. خپل ژوند او کاروبار ته په کتو ځان ته یو اغېزناک پروګرام جوړ کړئ.
