په بین الافغاني مذاکراتو کې اوږد ځنډ د دې سبب کېږي، څو په هېواد کې د ناامنۍ کچه لا ډېره او دواړو ښکېلو لورو ته د تلفاتو او مرګ ژوبلې ګراف په بې ساري ډول پورته شي او په هېواد کې د ناامنۍ او تاوتریخوالي لمن پراخه، ترهګریز بریدونه زیات او د افغانانو د جنګ او جګړې کټوه همداسې ګرمه وساتل شي.
د سولې بین الافغاني مذاکراتو کې ۲۳ ورځنی ځنډ په داسې حال کې رامنځ ته کېږي، چې د روان میلادي کال په لومړیو کې په امریکا او نورو عیسوي هېوادونو کې د عیسویانو اختر یا کریسمس لمانځل کېږي. له همدې امله د سولې په خبرو کې اوږده دمه منځ ته راغله. له کله نه هم چې د سولې خبرې پیل شوې، تل په یو نه یو ډول د سیمو هېوادونو له لوري متضررې شوې او د انحصار تر بریده رسېدلې دي. د سولې یاد ملي بهیر یې په بېلابېلو نومونو او بېلابېلو پلمو له خنډ او ځنډ سره مخ کړی دی.
کله چې په ۲۰۱۳ میلادي کال کې طالب استازي د متواترو خبرو پر مهال سیاسي بلوغ ته ورسېدل او په قطر کې یې د سیاسي تحرکاتو د پیل زمینه مساعده او د سیاسي دفتر د پرانیستل کېدو اجازه یې تر لاسه کړه؛ دوی په سیمه کې د یوه نوي سیاسي ځواک په توګه مطرح شول او د سیاسي ځواک ترڅنګ یې د پخوا په څېر پر پوځي ځواک هم ټوله تکیه، تګلاره او انګېزه متمرکزه کړه.
هغه وو چې په ۲۰۲۰ میلادي کال کې د فبروري په ۲۹مه د طالبانو او امریکایانو تر منځ د دوحې یو تاریخي هوکړه لیک لاسلیک کړ، چې له مخې به یې طالب جنګیالي پر امریکایانو او هم به امریکایان پر طالبانو بریدونه نه کوي.
اوس چې د طالبانو سیاسي پلاوي د ملا برادر په مشرۍ پاکستان ته سفر کړی دی، یاد پلاوی به په پاکستان کې د لوموړي وزیر عمران سربېره، د بهرنیو چارو له وزیر شاه محمود قریشي او د آی اېس آی له مشرانو سره هم د تړلو دروازو تر شا وګوري. له بلې زاویې پاکستاني چارواکو او سیاسیونو یې بیا د افغان سولې په غبرګون کې بېلابېل نظریات او وړاندوینې وړاندې کړې دي. د افغانستان لپاره د پاکستان ځانګړي استازي محمد طارق بیا په تازه او نویو څرګندونو کې ویلي، چې پاکستان ته د طالبانو سفر د دوی د سیاستونو یوه برخه ده. نوموړی وایي، دا سفر د پاکستان د سیاست یوه برخه ده، چې له مخې یې غواړي په افغانستان کې دایمي سوله او ثبات رامنځ ته شي او روان تاوتریخوالی د خبرو او مذاکزاتو له لارې حل او فصل شي.
د دې تر څنګ بیا د پاکستان لومړي وزیر عمران خان افغان ولسمشر محمد اشرف غني ته د ټلیفون له لارې د سولې په مورد د همکاریو ژمنه بیا تازه کړې. عمران خان د تېر په څېر یو ځل بیا ژمنه وکړه، چې په ټول توان سره به په افغانستان کې اوربند د تامین او تاوتریخوالي د له منځه وړلو لپاره هڅه کوي؛ خو پاکستاني چارواکو په دغو څرګندونو کې د پاکستان ملي عوامي ګوند مشر او ملتپال سیاستوال اسفندیار ولي خان ویلي که پاکستان له زړه او په رښتینې مانا وغواړي، افغانستان سولې ته رسېدلی شي. نوموړي زیاته کړې چې په افغانستان کې سوله او ثبات د پاکستان په خیر هم ده.
خو افغان ولسمشر محمد اشرف غني کندهار ولایت ته د خپل سفر پر مهال یوې ناستې ته ویلي، چې طالبان سولې ته ژمن نه دي او نه غواړي چې د سولې مذاکرات په بریالیتوب سره پیل شي او د سولې فرصت دوی په لوی لاس بیا بیا ضایع کوي.
اوس پوښتنه او اندېښنه دا ده، چې پاکستان به د تېر په څېر هغه کړې ژمنې عملي کړي او که هسې د کاذب سیاست او د دوه مخیتوب یوه بله لوبه چې اصلي طرحه کوونکي او تمویلېدونکي هېوادونه یې د سیمې هېوادونه دي، پیل کړې ده. ځکه پاکستان تر دې وړاندې هم په ځلونو له افغانستان سره دوه مخي لوبه کړې ده، ښایي د پاکستان دوه مخیتوب او منحوسې څېرې دغه روانه لړۍ دومره په اسانۍ سره پای ونه مومي؛ ځکه پاکستان تل د افغانستان په جنګ او جګړې کې لالونه لوټلي دي، نو له همدې امله نه غواړي په افغانستان کې سوله او ثبات رامنځ ته او افغانان په یوه ټغر سره راټول شي. افغان ولس بیا د متواترو غوښتنو پر اساس له دواړو ښکېلو غاړو څخه غوښتي، چې اوربند ته لومړیتوب ورکړي. افغان ولس له طالب پلاوي څخه په وار وار غوښتي چې د نورو د خوښۍ لپاره د افغانانو هیلې په ناهیلۍ نه بدلوي او اوربند ته لومړیتوب ورکړي.
خو طالبانو بیا د اوربند په خبرو پسې سر نه دی ګرولی او د دایمي اوربند خبرې یې رد کړي دي.
