د چين د جه جيانګ ولايت د مرکز هانګ جو ښار د پراخو ځنګلونو په منځ کې د ۵۶۷ کيلومتره مربع په پراخوالي د چيان داو په نوم يو لوی جهيل شته، چې څه باندې زر ټاپوګان پکې موجود دي. دغه جهيل د هانګ جو ښار څه دپاسه ۱۰ ميليونو کسانو ته څښاک اوبه برابروي.
دوکتوره مو چيوان پنځه کاله کيږي، چې د چيان داو جهيل په څنګلورې چون آن ولسوالۍ کې د چاپېريال ساتنې دنده ترسره کوي. نوموړې په ۲۰۱۶م کال کې د نړيوال بانک په يوې پروژې کې د کار پر مهال په لومړي ځل چيان داو جهيل ته ولاړه، له دغه جهيل سره يې خورا مينه پيدا شوه او هيله منده وه، چې په خپلو هڅو دغه جهيل وساتي، نو ځکه هغه اوس په چون آن ولسوالۍ کې مېشته شوې او هلته کار کوي.
چيان داو جهيل د چين د يانګځه سيند د شاوخوا سيمې د خلکو لپاره د څښاک اوبو ډېره مهمه سرچينه ده او ډېر شهرت لري. دوکتورې مو چيوان د علمي څېړنو په ترڅ کې ومونده، چې د دغه جهيل په شواخوا ځايونو کې ميشت کليوال د نباتاتو د کرلو لپاره زيات کيمياوي مواد او سره پر پټيو شيندي، چې ډېری يې له باران سره بيا چيان داو جهيل ته بهېږي. دغو کيمياوي موادو يادې اوبه ککړې کړې وې.
علمي او څېړنيزو ادارو دا ومونده، چې د پټيو ککړتيا د چيان داو جهيل په ټولو ککړو موادو کې څه دپاسه نيمه برخه نيسي.
هلته د ځايي کليوالو عمده اقتصادي سرچينه چای او د شولو کرکيله ده. دا يوه خورا سخته مسئله ده او ډېر ستونزمن کار دی، چې له يوې خوا د چيان داو جهيل اوبه وساتل شي او له بلې خوا کليوال د کرکيلي لپاره کيمياوي سره وکاروي.
دوکتورې مو چينګ په تېرو ۵ کلونو کې د چيان داو جهيل په اړه له ۸۸ سيندونو او ډنډو او ۲۳ ولسواليو او علاقه داريو څخه ليدنې کړې دي. هغې په پيل کې هېڅ لارې چارې نه درلودې، بيا يې له زياتو کليوالو، حکومتي چارواکو او کارپوهانو سره وکتل او د يادې مسئلې په اړه یې ورسره خبرې اترې وکړې. دوی يو ځای کېناستل او پر دې يې بحث وکړ، چې کوم تدبيرونه به اغېزمن وي، چې هم د ياد جهيل اوبه پاکې وساتل شي او هم کليوال خپلو فصلونو ته کيمياوي سره ورکړي. دوکتورې مو چيوان په دې اړه وويل، چې موږ ۱۲ تدبيرونه غوره او ازموينې مو ترسره کړې دي.
دوکتورې مو چيوان په ۲۰۱۸م کال کې د څو لويو تصديو او ټولګټو صندوقونو په همکارۍ د اوبو ساتلو په پار يو نوی صندوق جوړ کړ، چې مالي پيمانه يې کابو ۱۰ ميليونو يوانو ته رسېده او ځايي کليوال، حکومتي ادارې او تصدۍ يې پکې برخمنې کړې. دوی د شولو ايکولوژيکي چاپېريال په ازمويښتي توګه اصلاح او يو نوی بيولوژيکي سيستم يې جوړ کړ. اوس هلته د ۲ هکتارو په پراخوالي ازمويښتي کروندې کې شولې ښه حاصلات ورکړي، تر څنګ يې ګلانو او واښو ښه وده کړې او په اوبو کې رنګا رنګ کبان ژوند کوي.
دوکتورې مو چينګ په دې اړه وويل، چې ګلان او واښه د شولو لپاره ډېر ګټور تماميږي، زياتې حشرې راجلبوي، چې دا هم د شولو لپاره ډېره ګټه لري او په دې کړنې سره اوبه پخپله پاکيږي.
۶۱کلن کليوال يو يوی تيان د دوکتورې مو چيوان ازمويښتي کروندې اداره کوي. د ده په شان زيات شمېر کليوال پر دوکتورې مو چيوان باور لري او وايي، چې په راتلونکې کې به د دوی کروندې د ايکولوژيکي اصلاحاتو له لارې کيمياوي سرې ته اړتيا ونه لري.
د چين د جه جيانګ پوهنتون علمي څېړنه ښيي، چې د دوکتورې مو چيوان د ازمويښتي کروندو شولې، نه يوازې له ۱۰ نه ۳۰ سلنه ککړتيا کمولی شي، بلکې په خوړلو کې هم ډېر ښه خوند لري.
دوکتورې مو چيوان په چون آن ولسوالۍ کې د روان کال ازمويښتي کرونده له ۲ نه ۳۳۰ هکتارو ته پراخه کړې او پلان لري، چې په راتلونکو ۵ کلونو کې د ازمويښتي کروندې پراخوالی له ۵۰۰۰ هکتارو نه هم واړوي.
