کرونا وبا شاوخوا يو نيم کال کيږي، چې پر ګردې نړۍ لمن خوره کړې او بېلا بېلو هېوادونو ته يې سخت زيانونه رسولي دي. نړيوالې ټولنې د دې وبا ضد د مبارزې لپاره له هرې ممکنې لارې کار اخیستی او ډېر کوښښونه يې کړي دي. خو امريکا بیا څه کړي؟
امريکا د نړۍ د تر ټولو پياوړي هېواد په توګه، د دې وبا له رامنځته کېدو راهيسې تل غيرفعاله رويه غوره کړې، حتی په خپل هېواد کې يې د دې وبا د وقايې او کنټرول لپاره هېڅ اغېزناک تدبيرونه نه دي نيولي، خو برعکس پر چين يې پر له پسې بې ځایه تورونه لګولي او هڅې يې کړي، چې خپله پړه پرې ور واچوي.
امريکې د دغې ويروس د رېښې او سرچينې د لټولو په بهير کې هېڅ علمي او ساينسي کړنې نه دي ترسره کړي، خو يوازې يې په مداومه توګه پر چين هوايي تورونه لګولي او لا هم هڅه کوي، چې کوويډـ۱۹ ويروس د وو هان لابراتور پسې وتړي. که څه هم د روغتيا نړيوال سازمان او چين د ساينسپوهانو ګډ پلټونکي ګروپ له څېړنو وروسته په ډاګه شوې، چې هېڅ داسې امکان نه ليدل کيږي، چې وښيي، ياد ويروس دې د وو هان له لابراتور څخه پورته شوي وي، خو امريکا لا هم له روغتيا نړيوال سازمان څخه غواړي، چې په چين کې بيا پلټنه وکړي.
د امريکا موخه څه ده؟ ځواب يې اسان دی، دغه هيواد غواړي، چې خپله پړه پر چين واچوي.
د اسرائيل ټايمز په شمول څو نړيوالو رسنيو خبر ورکړی، چې د امريکا پوځ د ۲۰۱۹م کال په نومبر کې له اسرائيل او ناټو سازمان سره استخباراتي مالومات شريک کړل او ورته ويلي يې وو، چې ډېر ژر به د کرونا نوی ویروس خور شي او په مالوماتو کې يې د چين وو هان ښار هم ياد کړی و.
امريکې څنګه يوه مياشت مخکې د دې ساري ناروغۍ په هکله مالومات لرل؟
د همدې کال په اکتوبر کې په وو هان ښار کې د پوځونو نړيوالې سيالۍ ترسره شوې، خو د امريکا پلاوي په دغو سياليو کې هېڅ طلايي مډال تر لاسه نه کړ، چې دا د امريکې لپاره د خوښۍ خبر نه و، خو د اولمپيک په سږنيو لوبو کې، چې تازه د جاپان په پلازمېنې توکيو کې پای ته رسېدلي، دغه هيواد تر ټولو زيات طلايي مډالونه تر لاسه کړي او د مډالونو په ليست کې يې لومړی مقام نيولی دی.
نړيوالو ته اوس پوښتنې پیدا شوي، چې امريکايي سرتېريو د وو هان د پوځونو په نړيوالې سيالۍ کې څه وکړل؟ ولې په دسمبر مياشت کې کرونا ويروس خپور شو؟
بل دا چې د امريکا حکومت ولې په خپل هيواد کې دننه د ډېټريک فورټ لابراتور ناڅاپه وتړه؟
کرونا ويروس څنګه خور شو؟ امريکا په دې ښه پوهېږي، ځکه دغه هېواد ښايي د دې ويروس رښتينې سرچينه وي.
په امريکاد کې د ۲۰۱۹م کال په دوهمې نيمايي کې د برېښنايي سيګريټ سکاروي او انفلونزا ناروغي هم خپره شوې وه او شواهد دا هم ښيي، چې په امريکا کې د کرونا لومړۍ پېښه له وو هان مخکې رامنځته شوې وه.
اوس په امريکا کې څه باندې ۳۵ ميليونه کسان پر دغه ويروس اخته شوي او څه دپاسه ۶۲۰ زره کسان ترې مړه شوي دي. د امريکا سياستوال نه غواړي، چې د دې ويروس د سرچينې په اړه واقعي مالومات په ډاګه کړي، دوی يوازې په دې لګيا دي، چې سياست وکړي او پړه یې پر نورو واچوي. خو اخر به هم نړيوال د دې ويروس د رېښې په هکله رښتني مالومات ترلاسه کړي. که امريکا خپل ځان پياوړی هيواد بولي، نو بايد سمدلاسه ياده سرچينه پيدا کړي او د خپلو تېروتنو د سمولو لپاره دې وختي اغېزناک تدبيرونه ونيسي او خپل مسؤلیت دې ادا کړي.
