د ولسمشر دویم مرستیال د ټاکنو پر کمېسیون توندې نیوکې کړې دي. نوموړي ویلي چې د ټاکنیزو کمېسیونونو د کار د څرنګوالي له امله د حکومت حیثیت او اعتبار تر پوښتنې لاندې راغلی دی. دانش ویلي چې کمېسیونونو د خلکو په حق کې جفا کړې ده. هغه یو ځل بیا په ټاکنیزو کمېسیونو کې د اصلاحاتو خبرې کړې دي. سرور دانش ویلي: «ټاکنیز کمېسیونونه باید پوه شي چې د خلکو د صبر کاسه ډکه شوې او تر دې زیات نشي کولای چې د کمېسیونونو کمزورۍ وزغمي. اوس د ملي یووالي حکومت مکلفیت دا دی چې هر اړخیز اصلاحات راولي».
حکومت له هغه وروسته د ټاکنیزو کمېسیونونو په تړاو نیوکې پیل کړې چې وړمه ورځ د امریکا سفارت هم په کمېسیونو کې د اصلاحاتو غوښتنه وکړه. که څه هم ویل کېدل چې د ټاکنیزو کمېسیونونو کمېشنران تل ارګ ته غوښتل کېدل، سرور دانش او ولسمشر ورته امرونه کول او ان دوی ته یې توندې او نامناسبې خبرې کولې، خو دا خبرې پټې وې او تر خلکو پورې نه وې رسېدلې. اوس دا دی حکومت په ښکاره نیوکې کوي او د ټاکنیزو کمېسیونو غړو ته پیغام ورکوي چې ستاسې دنده نوره ختمه ده.
اوسني ټاکنیز کمېسیونونه، کمېشنران، اوسنی قانون او جوړښت هغه څه دي چې ملي یووالي حکومت پرې څه باندې دوه کاله کار وکړ او دا یې ټاکنیز اصلاحات وبلل. اوس ښکاري چې دا اصلاحات نه، بلکې تخریب و. د ملي یووالي حکومت ټاکنیز اصلاحات بدبویه شوي، خوسا شوي او خلک ورسره په تکلیف دي. حکومت له دغو کمېشنرانو تمه لرله چې ولسي جرګه د دوی په خوښه جوړه کړي، که څه هم د حکومت ډېر سیاسي مخالفین په قصدي ډول ناکام شول، خو په بریالیو کسانو کې کمېشنرانو د ارګ د خوښې پر ځای خپل جیب ته پام وکړ او په دې ډول د ارګ او کمېسیون اړیکې ترینګلې شوې.
اوس چې حکومت بیا د اصلاحاتو خبره کوي، پوښتنه دا ده چې څه ډول اصلاحات به راځي؟
د حکومت ټاکنیز اصلاحات خو د ټاکنیزو کمېسیونو تخریب و، فاسد، غله او په ارګ او اجرایه ریاست پورې تړلي کسان یې پر ټاکنیزو کمېسیونو واکمن کړل. کمېسیونونه یې هم د نور حکومت په شان ووېشل. د کمېسیونو ډېری اوسني غړي نه یوازې په سیاسي لحاظ تړلي کسان وو، بلکې لوېدلي مفسدین هم وو. د حکومت د دغه تخریب او وېش بد بوی اوس احساسېږي. که دوی بیا هم راځي او کمېسیونونه بیا د اصلاحاتو په نوم له خپلو خلکو ډکوي او د اوسنیو کمېشنرانو په شان ارګ، اجرایه ریاست او خپل جیب ته ژمن کسان ورته راولي، نو خلک به له ټاکنو نفرت وکړي او بیا به زړه ښه نه کړي چې ګوتې تورې کړي. د ولسمشرۍ ټاکنې په مخ کې دي، ارګ به زیاته هڅه وکړي چې خپل کسان کمېسیون ته بوځي، ځکه چې دوی یو ځل بیا غواړي چې د درغلۍ او فساد له لارې ځان واک ته ورسوي. له همدې امله سیاسي ګوندونو، سیاسي مخالفینو او خلکو ته پکار ده چې د ارګ د دې دسیسې مخه ونیسي. ټاکنیز کمېسیونونه باید اصلاح شي، خو د حکومت اصلاح، اصلاح نه ده، بلکې بدبویي او د ټاکنیزو کمېسیونو تخریب دی. د اصلاحاتو لپاره باید ټول سیاسي مخالفین لاس سره ورکړي او خلک به یې ملاتړ وکړي، څو په ريښتنې مانا خپلواک او پاک کمېسیونونه ولرو.
