د ولسمشر دویم مرستیال سرور دانش د ټاکنو پر خپلواک کمېسیون توندې نیوکې کړې دي. د ده په خبره، دغه کمېسیون د خلکو په حق کې جفا کړې ده او د دوی رایو ته یې درناوی نه دی کړی. د ولسمشر دویم مرستیال د (حقوقي مرستو ملي کنګرې) په پرانیستغونډه کې د خبرو پر مهال وویل چې ټاکنې د ولسواکۍ بنسټ او د خلکو مدني حق دی. د نوموړي په خبره، د ټاکنو خپلواک کمېسیون د خلکو دغه مدني حق ته زیان رسولی او هغه ته یې درناوی نه دی کړی.
دانش وايي، په ټاکنیزو کمېسیونونو کې فساد او کمکاري د دې سبب شوې چې د ملت او دولت باور ته زیان ورسېږي. دغه کمېسیون خلک پر ټاکنو او دولت بې باوره کړي دي او داسې فکر کوي چې د ولس رایه ارزښت نه لري. سرور دانش همدا راز خبرداری ورکړی چې که د ټاکنو په خپلواک کمېسیون کې اوسنی فساد موجود وي، نو راتلونکې ولسمشریزې ټاکنې به تر دې هم زیاتې له ناندریو او ستونزو ډکې وي. هغه ویلي چې حکومت به په ټاکنیزو کمېسیونونو کې پراخ اصلاحات راولي. دانش وايي، «د ټاکنیزو کمېسیونونو کړنو، کمکاریو، فساد او بې نظمیو ملت او دولت بې باوره کړل، نو ځکه اوس د حکومت مسوولیت دی چې په دغه کمېسیونونو کې پراخ اصلاحات راولي، څو راتلونکې ولسمشریزې ټاکنې له فساد او ناندریو پرته ترسره شي».
هغه د ډېرو نیوکو ترڅنګ پر دغه کمېسیون یوه نیوکه دا هم وکړه، چې د دریو میاشتو په تېرېدو یې لاهم د کابل ولایت د ولسي جرګې د ټاکنو پایلې نه دي اعلان کړې. د هغه په خبره، د ټاکنیزو کمېسیونونو دغو کمکاریو د خلکو حوصله تنګه کړې ده او کمېسیون ته پکار ده چې د خلکو غوښتنو ته پام وکړي.
سرور دانش په دې غونډه کې د خبرو پر مهال همدا راز په عدلي او قضايي برخه کې هم پر شته فساد او ستونزو نیوکه وکړه. هغه وویل، دغه ارګانونه باید په خپلو چارو کې اصلاحات راولي او شته ستونزې له منځه یوسي.
بل پلو د ټاکنو خپلواک کمېسیون بیا وايي چې دوی د خلکو رایو ته درناوی لري او شفافیت ته ژمن دي. د دغه کمېسیون کمېشنر سید حفیظ الله هاشمي بیا وايي، د دوی کشفي برخې خپل کار کوي او هر هغه څوک چې په فساد او درغلیو کې ښکېل وي، د قانون منګولو ته یې سپاري. د نوموړي په خبره، ښایي د ټاکنو په کمېسیون کې ستونزې وي، خو کشفي ارګانونه دنده لري چې دغه موارد روښانه او پر وړاندې یې قانوني اقدامات ترسره کړي.
تر دې وړاندې هم د ټاکنو پر خپلواک کمېسیون ډېرې نیوکې شوې وې. ډېرو ګوندونو او پر ټاکنو څارونکو ټولنو ویلي چې د ټاکنو خپلواک کمېسیون هنګرونه د رایو د پلور او پېر پر بازار بدل شوي دي او دغه کمېسیون په لوی لاس د رایو د بیا شمېرنې تر نامه لاندې فساد او درغلیو ته لاره هواره کړې ده. سیاسي ګوندونه، پر ټاکنو څارونکې ټولنې او مدني فعالان وایي چې د ټاکنو کمېسیون اوسنیو ستونزو او کمکاریو ته په کتو، دغه کمېسیون د راتلونکو ولسمشریزو ټاکنو د ترسره کولو وړتیا نه لري. خو بل پلو داسې راپورونه خپاره شوي چې ښایي تر ولسمشریزو ټاکنو مخکې د ټاکنو په خپلواک کمېسیون کې پراخ اصلاحات او بدلونونه رامنځ ته شي.
