تر هرچا ډېر اولادونه مور او پلار ته ګران وي، تاسې هم دا خبره منی. دا احساس هېڅ وخت مه کوئ چې مور او پلار مو ستاسې بل ورور یا خور ته تر تاسې ډېر ناز ورکوي یا د تاسې په پرتله هغه ورته ډېر ګران دي.
خو که داسې احساس کوی چې له تاسې سره دا ډول چلند کېږي، وېرېږئ مه. ستاسې په شان ډېر نور هم دا فکر کوي چې په کورنۍ کې ورسره ورته چلند کېږي.
د کورن پوهنتون څېړونکو په دې اړه په زړه پورې څېړنه کړېده، هغوی له ۲۷۵ میندو سره چې دوه یا تر دوو زیات اولادونه یې لرل او د ۶۰ – ۷۰ کلونو په شاوخوا کې یې عمرونه وو، خبرې کړې دي او له ۶۷۱ د همداسې میندو له اولادونو یې هم ورته پوښتنې کړې دي.
په سلو کې اویا دغو میندو د هغو اولادونو چې دوی ته ډېر ګران وو، نمونه اخیستي دي. بل پلو هغو اولادونو یوازې په سلو کې پنځلسو دا منلې چې د هغوی مور او پلار د دوی (خور او ورور) ترمنځ د مساواتو برابروالی رعایت کړی دی.
کله چې مور او پلار خپل یو زوی/لور ته د نورو په پرتله ډېره توجه کوي، څېړنو ښودلې چې دا وخت یې دواړه اولادونه هغه چې دوی ورته توجه کوي او هم هغه چې دوی ورته توجه نه کوي، پر رواني ناروغۍ اخته کېږي. له یوې خوا هغه زوی/لور چې کمه توجه ورته کېږي، د کمترۍ احساس کوي او هغه چې ډېره توجه ورته کېږي، د مور او پلار د ډېرې توجه له امله خودخوا کېږي چې دا بیا ورته ډېرې بدې پایلې زیږوي.
د یو چا کم دوست لرل ښه عادت نه دی، خو د انسان طبیعت فطرتاً داسې دی چې ځینې کسان یې د بېلابېلو عادتونو له مخې خوښېږي او له ځینو سره بیا کینه کوي یا له هغوی څخه لرې والی خوښوي.
کېدای شي خپله شاوخوا کې ډېر داسې کسان وپېژنئ چې د نورو اولادونو په پرتله له یو زوی/لور سره ډېرې صمیمي او نږدې وي.
د بېلګې په توګه، ستاسې ورور او پلار ورته فکر لري او په اسانۍ سره یو بل درک کولی شي، یا ځینې هغه کړنې چې د انسان په کنټرول کې نه دي، لکه، د نړۍ او خلکو په اړه ستاسې لید، ستاسې د مور او پلار په پرتله ستاسې له ورور او خور سره په څو څو واره لرې او مختلف دی چې له همدې وجې ستاسې مور او پلار ستاسې په پرتله هغوی ته نږدې پاتې کېږي.
دا ډول برخورد یا نظر لرل کېدای شي زموږ فطري طبیعت وي، خو که زموږ له مور او پلار نه دا ډول کړنه چې هغوی زموږ په پرتله نورو ته ډېره توجه کوي او یا هر وخت د هغوی نظر مني، ترسره شي؛ دا بیا ډېره بده ده. ځکه موږ له مور او پلار څخه دې ډېرې او بې کچې مینې غوښتنه کوو او دا د هر یو اولاد فطري غوښتنه ده.
په هر حال، د اولادونو ترمنځ تبعیض په هر صورت کولای شي یوه کورنۍ له جنجالونو سره مخ کړي. ایا ستاسې مور او پلار ستاسې له ورور او یا خور سره ستاسې په نسبت ډېره مینه کوي؟ ایا ستاسې د ورور یا خور پر بریاوو ستاسې په نسبت ډېر خوشحاله کېږي؟ ایا تل ستاسې په مقابل کې د هغوی پلوي کوي؟ ایا دا حس کوی چې هغوی ستاسې ترمنځ د تبعیض د ایجاد سبب شوي، داسې چې له هغوی سره ښه چلند، مینه او مهرباني کوي او تاسې ته توجه نه کوي؟ ایا تاسې له دې ډول کړنو ځورېږی؟ موږ په همدې مقاله کې درته هغه لارې چار در پېژنو چې پر مټ یې د یو بالغ او رون انډي کس په څېر د هغوی په مقابل کې داسې عمل وکړی، څو دا هرڅه پرې له منځه یوسی.
۱ـ هره خبره ځان ته مه کش کوی
کېدای شي ستاسې د مور او پلار دا چلند په دې معنا نه وي چې هغوی ستاسې بل کوم ورور یا خور سره ستاسې په پرتله ډېره مینه لري، بلکې خبره دا ده چې هغوی په هر دلیل چې له هغوی سره ډېره مینه کوي یا د هغوی په خوا کې ځان راحت ګڼي، دا د هغه زوی/لور په فردي ځانګړنو پورې اړه لري.
کېدای شي تاسې اصلاً په دې ځای پوه نه وی یا مو هېڅ ورته پام نه وي. کېدای شي هغوی هېڅ دا احساس و نه کړي چې تاسې د نورو اولادونو په وړاندې مات او کم راولي او یا قصداً له تاسې سره دا عمل وکړي. خو که قصداً دا کار کوي، کېدای شي یوازینی علت یې هغوی ته ستاسې کم ارزښت او یا هم کمه توجه وي.
۲- په بل ځای کې مو د ځان لپاره د ژوند کولو زمینه برابره کړئ
د داسې کسانو په لټه کې شی چې د هغوی په واسطه یا له هغوی نه په تقلید، مینه، زړه سوی او د یو بل منل چې په کورنۍ کې مو نه دي ترلاسه کړي، ترلاسه کړی. خو پام مو وي چې یوازې له ښو کسانو څخه دا عادت خپل کړی، ځکه د هڅونې او ښه سلوک یا چلند تمه له هر چا نه شي کېدای.
موږ ډېر په داسې کورنیو کې ژوند کوو چې د کورنۍ له ډېرو غړو سره مو فکر او نظز یو شان نه دی، هغوی پر یو څه او موږ پر بل څه باور لرو. خو ښه خبره دا ده چې په دنیا کې ډېر داسې کسان شته چې ستاسې دا نمیګړتیا(د کورنۍ له غړو سره نه جوړجاړی) ډکه کړي.
بیا هم ټینګار کوو چې د داسې کسانو په انتخاب کې ډېر غور وکړئ، ځکه له هر چا دا تمه نه شي کېدای.
۳- په داسې وخت کې مو له همغه ورور یا خور سره اړیکه مه خرابوئ
له ورور او خور سره مو سیالي مه کوئ، دا چې هغوی ته د مور او پلار لهخوا ډېر ارزښت ورکول کېږي، هغوی له دې وجې مه ځوروئ. که دا هرڅه ستاسې په حق کې رښتیا هم وي، بیا هم له هغوی سره ښه چلند وکړئ. دا چې تاسې د خپلې کورنۍ د غړو په زړونو کې ځای نه لری، خپل زړه مه ماتوئ، کولای شی د هغوی زړونو ته لار پیداکړی، فقط له هغوی سره مینه وکړی او له ځان غوښتنې تېر شئ.
په مقابل کې یې دا ومنئ چې له مور او پلار سره ستاسې رابطه، خپله په تاسې پورې اړه لري، نه په هغوی پورې.
۴- هرڅه چې واقعیت لري، هغه ومنئ
که مو ومنله چې نه شی کولای له مور او پلار سره هغسې چې ستاسې زړه غواړي اړیکه ټینګه کړی، له دې څخه د ښه حال لرلو چانس لری. کولای شی خپل فردي فکر چې هم ځان او هم هغوی ته په درناوي قایل شي، پیاوړی کړی. دا ډول کړنه اسانه نه ده، خو که یې سرته ورسوی، کېدای شي وضعیت مو ورسره ډېر بدلون وکړي.
اول تر هرڅه مخکې په دې اړه فکر وکړئ چې کورنۍ مو ستاسې په اړه کومې قربانۍ ته تیاره ده او وروسته د هغه څه په اړه فکر وکړئ چې تاسې ته د کورنۍ لخوا په واک کې درکړل شوي دي. که دا هرڅه درک کړای شی، بې له شکه چې د خپلې کورنۍ د غړو نوک به هم په ټوله دنیا ور نه کړی.
۵- د خپل کورني ژوند لپاره مو وخت او انرژي مصرف کړئ
که په داسې کورنۍ کې دنیا ته راغلي یاست چې له تاسې سره یې پوره مینه او ستاسې یې سمه پالنه نه وي کړې او تل مو د وروڼو او خویندو په منځ کې د تبعیض احساس کړی وي، هڅه وکړئ چې له واده کولو وروسته دا ټولې کاستۍ او نیمګړتیاوې جبران کړی. خپله ټوله هڅه وکړئ، څو هغسې چې مو زړه غواړي، د اولادونو پالنه وکړی او ټول هغه څه چې تاسې ترې ځورېدلي یاست، تکرار نه کړئ.
