د پاکستان مرستيال صدراعظم او بهرنيو چارو وزير اسحاق ډار د جون په ۲۴مې نېټې د چين د کمونېست ګوند د مرکزي کمېټې د سياسي بيورو له غړي او بهرنيو چارو وزير وانګ يي سره تليفوني خبرې کړې دي.
اسحاق ډار چيني سیال ته د چين د کمونېست ګوند د جوړېدو د راتلونکې ۱۰۵مې کليزې په پار توده مبارکي ويلې او د ايران او امریکا د خبرو اترو د نوي پړاو په اړه يې معلومات ورکړي او د پاکستان له منځګړيتوب څخه د چين له ملاتړه يې مننه کړې ده.
ډار ويلي، د چين دولت رئیس شي جين پينګ د منځني ختيځ د سولې او ثبات د ساتلو لپاره څلور فقره ييز وړانديز کړی او پاکستان او چين د خليج د سولې او ثبات لپاره پنځه فقره يیز وړانديز کړی دی، چې دواړو د تاوتريخوالي د کمېدو لپاره مهم رول لوبولی دی.
وانګ يي د ايران او امریکا د تفاهم لیک لاسليک د نړيوالې ټولنې د ګډو هڅو نتيجه بللې او په وينا يې، پاکستان پکې کليدي او ځانګړی رول لوبولی دی.
نوموړي ويلي، د امريکا او ایران ترمنځ د سولې بهیر تازه پیل شوی او راتلونکې لار يې ښايي اوږده او سخته وي او په وینایې، چين به د پخوا په څېر د پاکستان او نورو همفکره هېوادونو له رغنده رول ملاتړ وکړي او نږدې خبرې او همغږي به ورسره وساتي.
وانګ يي د خبرو د راتلونکي پړاو په اړه درو مهمو ټکو ته اشاره کړې:
۱- د جګړې د پای ته رسېدو وضعيت باید وساتل شي او د جګړه يېز اور د بيا بلېدو مخه باید ونيول شي.
۲- له هرمز تنګي څخه د بېړيو تګ راتګ باید ژر تر ژره اعاده شي، څو نړيوال توليدي او اکمالاتي ځنځير ثابت وساتل شي.
۳- د منځني ختيځ هېوادونو د اړيکو له ښه والي څخه باید ملاتړ او د سيمه يیز امنيت بحث پيل شي.
