د چين د ساينس او ټکنالوژۍ ستايغونډه، د چين د علومو اکاډمۍ او د انجينرۍ اکاډمۍ د اکاډميشنرانو عمومي غونډه او د دغه هېواد د علمي او تخنيکي ټولنې ۱۱م ملي کانګرېس د جولای په ۸مه نېټه د چين په پلازمېنه بېجينګ کې ترسره شول.
د چين دولت رئيس شي جين پينګ په دغه غونډه کې ګډون او مهمه وينا کړې ده.
نوموړي د چين د تېرو څو کلونو د سترو او مهمو علمي او تخنيکي لاسته راوړنو ستاينه کړې، د ساينس او ټکنالوژۍ اوسني پرمختيايي حالت، دندو او ننګونو ته ځغلنده کتنه او په اړه يې ژورې څېړنې کړي، يو لړ روښانه غوښتنې يې وړاندې کړي او د هېواد د لوړې کچې د علمي او تخنيکي ځانبسياينې په پار اغېزمنه لارښوونه يې کړې ده.
روان کال د چين د اقتصادي او ټولنيز پرمختګ د ۱۵م پنځه کلن پلان پيلامه ده او دغه هېواد د يو علمي او تخنيکي ځواکمن هېواد د ابادۍ کليدي مرحلې ته ننوتلی دی.
۲۰۳۵ کال ته، چې چين به تر همدې وخت د يو علمي او تخنيکي ځواکمن هېواد د ابادۍ موخې ته ورسېږي، يوازې ۹ کاله پاتې دي. نو علمي او تخنيکي نوښتونه باید د چيني شکله عصريتوب د پرمخبيولو په پار د ملاتير او لارښوونې رول ولوبوي.
د چين دولت رئيس شي جين پينګ په همدې اړه په شپږو برخو کې روښانه غوښتنې وړاندې کړې دي.
علمي او تخنيکي نوښتونه ستره سيسټماتيکه پروژه ده. شي جين پينګ په دغه غونډه کې ويلي، چين بايد د علمي او تخنيکي نوښتونو په اتکا د سيسټماتيکو ستونزو د لرې کولو وړتيا پياوړې کړي او د اړوند ستراتيژيکي پلان، تګلارو او اقداماتو، مهمو دندو، علمي او څېړنيزو ځواکونو، سرچينو او سيمه ييزو نوښتونو په شمول ډېرو برخو کې باید عمومي اغېزمن ترتيبات ونیسي.
نوموړي د هېواد د بيړنيو او دايمي اړتياوو له مخې د عالي کچې ډيزاين او د ميکانيزمونو ترمنځ دوامداره ملي همغږي رامنځته کړې او د علمي او تخنيکي نوښتونو ملي عمومي توان او د سيالۍ تفاوق يې پياوړی کړی دی.
د چين دولت رئيس شي جين پينګ په دغه غونډه کې ويلي، علمي او تخنيکي نوښتونه بايد د واقعي کارونې په موخه وي، د صنعتي چارو په نوښتونو کې بايد اړوندې علمي مسئلې وړاندې شي او علمي او تخنيکي نوښتونه باید په واقعي اقتصادي او ټولنيزو ګټو وګرځي.
نوښتونه د راتلونکي پرمختګ کيلي بلل کېږي او علمي او تخنيکي چارې پر له پسې اصلاحاتو ته اړتيا لري.
د چين دولت رئيس شي جين پينګ په خپلې وينا کې پر دې ټينګار کړی، چې هېواد يې بايد په علمي او تخنيکي چارو کې د خپلو پانګونو اغېزه او موثريت لوړ کړي او اړوند سيسټمونه، ميکانيزمونه او ماموريتي چلند باید بشپړ کړي، څو رښتينې پانګې په ګټورو چارو ولګېږي او لا زياتې ګټې ترلاسه شي.
راتلونکې علمي چارې په ځوانانو پسې تړاو لري. دولت رئيس شي جين پينګ يو ځل بيا ويلي، چې چين بايد د ځوانو علمي او تخنيکي مستعدو کسانو روزنې ته د يوې ستراتيژيکې پروژې په نظر وګوري.
