په کندهار کې د هېواد په کچه د درملو د تولید تر ټولو لویه فابریکه جوړېږي، چې اوسمهال یې د ودانۍ جوړولو چارې نیمايي مخ ته تللې دي.
د سنو فارما په نوم دغه فابریکه به پر نړیوال معیار درمل تولیدوي، چې د کار ټول بهیر به یې د نړیوال روغتیايي سازمان لخوا څارل کېږي.
خلک او د روغتیا برخې کارکوونکي وايي، د دې فابریکې له فعالېدو سره به هېواد تر یوه بریده د درملو په برخه کې بر خپل ځان بسیا او د غیر معیاري درملو د واردېدو مخنیوی به هم وشي.
د يادې فابریکې رییس محمدسعید صدیق رسنیو ته ویلي، دغه لویه فابریکه د ۷۱ افغان سوداګرو په ګډه ونډه جوړېږي، چې دا په هېواد کې د ډېرو پانګه والو لومړنی سهامي شراکت دی.
هغه زیاته کړه، د دې فابریکې پر جوړولو ۳۱ میلیونه ډالر لګښت راځي چې په ۲۰۲۰ ز کال کې به ګټې اخیستنې ته وسپارل شي.
