د هيل نشریه: افغانستان کې د ستونزو یوازینی لامل د امریکا موجودیت دی

د هيل په نامه نشریې د افغانستان په اړه خپرې کړې مقاله کې ویلي، په افغانستان کې د ستونزو یوازینی لامل د امریکا او نړیوالې ټولنې موجودیت دی. د مقالې د لیکوال په باور په افغانستان کې د امریکا له میلیاردونو ډالرو مصرف سره سره دا هېواد د دې جګړې پر ګټلو بریالی شوی نه دی او په وینا یې؛ د افغان ستونزې هواری د امریکا له وسه پورته خبره ده. لیکوال او نظامي کارپوه جراد لابر وایي، دوی د امریکا او طالبانو ترمنځ د پیل شویو خبرو په لړ کې د ټرمپ له هغې پرېکړې هرکلی کوي چې په وینا یې غواړي له افغانستانه خپل څلور زره سرتېري وباسي. هغه د واشنګټن پوسټ ورځپاڼې هغو اسنادو ته په اشارې چې ویلي یې وو، امریکایي مشرانو د افغان جګړې په اړه خلک تېر ایستلي دي زیاته کړې، د افغان جګړې ګټل ناممکن دي او له همدې امله د سرتېرو ایستل غوره پرېکړه ده. د مقالې په وروستۍ برخه کې د اداري فساد په اړه هم لیکل شوي، د امریکا او ځینې نورو مرستندویه هېوادونو او بنسټونو له لوري د بې شمېره پیسو ورکړه او له هغو د غوره نظارت نشتون په دې هېواد کې پراخ فساد ته لار هواره کړې او دا پیسې د بیا رغونې پر ځای د فاسدو دولتي چارواکو او مافیایي کړیو جیبونو ته تللې دي.