امریکایي چارواکي وایي، افغان جګړه یوازې د افغان حکومت او طالبانو تر منځ د خبرو له لارې د حل وړ ده. وروسته له هغه چې واشنګټن پوسټ د افغان جګړې په اړه ځینې اسناد خپاره کړل، امریکايي حکومت دلته د روان وضعیت په اړه تر سخت فشار لاندې دی. نړیوالې رسنۍ پر دې باور دي چې امریکا د یوې بې پلانه او نامعلومې جګړې لپاره زرګونه افغانان وژلي دي. په دې وروستیو کې ډېرو رسنیو د واشنګټن پوسټ پر اسنادو تحلیلونه خپاره کړي. امریکايي جنرالان هم ځان بریالی بولي او په خبره یې، اوس د دې وخت دی چې جګړه د افغانانو په لاس ختمه کړل شي.
د واشنګټن پوسټ د اسنادو تر خبرېدو وروسته، د لومړي ځل لپاره لوړپوړو امریکايي نظامیانو پر دې اسنادو څرګندونې وکړې. دوی دغه اسناد رد کړل، خو ځانونه یې بریالي وبلل. د امریکا د پوځ لوی درستیز جنرال مارک میلي وايي، اسناد ناسم دي او دوی په افغانستان کې خپلې موخې تر لاسه کړې دي. د ده په خبره، افغانستان اوس یو حکومت لري او طالبانو ته پکار ده چې له یاد حکومت سره خبرې وکړي. میلي وايي، افغان جګړه یوازې او یوازې د طالبانو او افغان حکومت تر منځ د مخامخ خبرو او توافق له لارې د ختمېدو وړ ده.
بلخوا دې هېل نړیوالې نشریې هم بیا په افغانستان کې پر روانه جګړه یو تحلیل خپور کړی دی. په دغه تحلیل کې راځي چې په افغانستان کې د روانې اوږدې جګړې ستر لامل د امریکا موجودیت دی او که دغه هېواد له افغانستانه خپل ځواکونه وباسي، نو خونړۍ جګړه به هم ورسره ختمه شي. د مقالې د لیکوال په باور، په افغانستان کې د امریکا له میلیاردونو ډالرو مصرف سره سره، دا هېواد د دې جګړې پر ګټلو بریالی شوی نه دی او په خبره یې، د افغان ستونزې هواری د امریکا له وسه پورته خبره ده.
لیکوال او نظامي کارپوه جراد لابر وایي، دوی د امریکا او طالبانو تر منځ د پیل شویو خبرو په لړ کې د ټرمپ له هغې پرېکړې هرکلی کوي، چې په خبره یې، غواړي له افغانستانه خپل څلور زره سرتېري وباسي. هغه وايي: ((د ټرمپ دا پرېکړه پر ځای ده چې غواړي له افغانستانه سرتېري وباسي. اوس د دې وخت دی چې په افغانستان کې خپل حضور پای ته ورسوو)).
لابر د واشنګټن پوسټ ورځپاڼې هغو اسنادو ته په اشارې چې ویلي یې وو، امریکایي مشرانو د افغان جګړې په اړه خلک تېر ایستلي دي، زیاته کړې، د افغان جګړې ګټل ناممکن دي او له همدې امله د سرتېرو ایستل غوره پرېکړه ده. دی ټینګار کوي چې په افغانستان کې د امریکایي ځواکونو په حضور سره به یوازې او یوازې د دوی تلفات ډېر شي، خو بیا به هم له نظامي لارو جګړه و نه ګټل شي.
د دې هېل په دغه مطلب کې د اداري فساد په اړه هم لیکل شوي، د امریکا او ځینو نورو مرستندویه هېوادونو او بنسټونو له لوري د بې شمېره پیسو ورکړه او له هغو د غوره نظارت نشتون په افغانستان کې پراخ فساد ته لار هواره کړې او دا پیسې د بیارغونې پر ځای د فاسدو دولتي چارواکو او مافیایي کړیو جیبونو ته تللې دي.
بلخوا د امریکا د دفاع وزیر بیا د دې جګړې پر پای ته رسولو ټینګار کوي. مارک ایسپر په یوه خبري غونډه کې د خبرو پر مهال وویل چې دوی په افغانستان کې یو واضح ماموریت لري او هغه د ترهګرو ختمول دي. د ده په خبره، دوی د ترهګرو تر ختمولو پورې په دغه هېواد کې خپل ماموریت ته ادامه ورکوي او اجازه نه ورکوي چې ترهګرې ډلې په دې هېواد کې امن پټنځایونه ولري. نوموړي د سرتېرو د کمولو په اړه هم ویلي چې تر اوسه یې په دې برخه کې رسمي سپارښتنه او یا امر نه دی تر لاسه کړی. د پنټاګون مشر دا څرګندونې داسې مهال کوي چې په دې وروستیو کې له افغانستانه د زرګونو عسکرو د وتلو راپورونه خپاره شوي دي.
