د بېجينګ د پارالمپيک ژمنيو لوبو د پای مراسم پر ځايي وخت د مارچ د ۱۳مې نېټې په ماښام د چين په ملي سټوډيوم کې تر سره شول.
د بېجينګ پارالمپيک ژمنيو لوبو ۹ ورځې دوام درلود او په دې موده کې يې په زړه پورې شېبې او خوږې نغمې خورې کړي او نړيوالو ته يې نه هېرېدونکې خاطرې ډالۍ کړې دي.
د دغو لوبو پای مراسم د خدای پامانۍ يا مخه ښې مانا نه ورکوي، بلکې نړيوالو ته يې د یو ځای د ګډ راتلونکي په لور د خوځښت پیغام ورکړی دی.
د يادونې وړ ځای دا دی، چې د چين د پارالمپيک ژمنيو لوبو ملي لوبډلې په دغو لوبو کې د ۱۸ طلايي مډالونو په شمول ۶۱ مډالونه تر لاسه کړي او د مډالونو په لېست کې يې لومړی مقام نيولی او دغه شمېر بې ساری ښودل شوی دی.
د معلوماتو له مخې، د چين ملي لوبډلې په لومړي ځل د ۲۰۰۲م کال د پارالمپيک ژمنيو لوبو په سياليو کې برخه اخيستې وه. د چين ملي لوبډلې په تېرو شلو کلونو کې يوازې د پيونګ چانګ د ۲۰۱۸م کال د پارالمپيک په ژمنيو لوبو کې يو طلايي مډال تر لاسه کړی و.
د بېجينګ د پارالمپيک په ژمنيو لوبو کې د چين د ملي لوبډلې له برياليتوب څخه څرګندېږي، چې په تېرو څو کلونو کې په چين کې د معلولينو چارو ښه پرمختګ موندلی دی. د بېجينګ د اولمپيک د ژمنيو لوبو د تشکيلاتي کمېټې مرستيال يانګ شو ان ويلي، چې د چين د اقتصاد او ټولنې پرمختګ د معلولينو د سپورټي چارو د پرمختګ لپاره ښه زمېنه برابره کړې ده. دغه راز، د چين معلولين د خپلو چارو پر پرمختګ ټينګ هوډ او باور لري او د دې لپاره نه ستومانه کېدونکي کوښښونه کوي، نو د مختلفو عواملو پر مټ يې برياليتوبونه تر لاسه کړي دي.
د چين د پارالمپیک ژمنيو لوبو ملي لوبډلې د تاريخ د نوي ريکارډ د جوړولو تر څنګ، چين نړۍ ته د پارالمپيک ډېرې په زړه پورې ژمنۍ لوبې وړاندې کړې دي.
د پارالمپيک نړيوالې کمېټې رئيس اندريو پارسونس، چې په ۲۰۰۸م کال کې یې د برازيل د ملي لوبډلې د غړي په توګه د بېجينګ د پارالمپيک په دوبنيو لوبو کې هم ګډون کړی و، څرګنده کړې، چې بېجينګ د کرونا وبا د وقايي او کنټرول، د سټوډيومونو او سپورټي ميدانونو د ابادولو، له خنډه د پاک چاپيريال د ساتلو او د کارکوونکو او داوطلبانو د خدمتونو په شمول بېلا بېلو برخو کې ډېر ښه کارونه کړي دي او دده په زړه يې خوږې خاطرې پرېښودلې دي.
د بېجينګ د پارالمپيک ژمنيو لوبو موخه د ټولې نړۍ ابادول دي او همدا د نړيوالو ګډه هيله هم ده. اوس د معلولينو شمېر د نړۍ په عمومي نفوسو کې پنځلس سلنه نيسي. سپورټ او ورزش د معلولينو په مقابل کې د سپکاوي کړنو د مخنيوي ډېره ښه لار ده او په دې مناسبت معلولين له روغو کسانو سره يو ځای د ګډ راتلونکي په لور ګامونه پورته کولای شي.
بېجينګ د اولمپيک او پارالمپيک ژمنيو لوبو د کوربه حق له تر لاسه کولو وروسته، ژمنه کړې وه، چې اولمپيک او پارالمپيک لوبې به يو شان ترسره کړي او لوبغاړي به پکې وځلېږي. دا د يو لوی او مسؤلانه هېواد په توګه د چين ژمنه وه او په ډېر ښه شکل يې پوره کړې ده.
د بېجينګ تشکيلاتي کمېټې د پارالمپيک ژمنيو لوبو د درېيو حوزو په څو لکو ځايونو کې له خنډه پاک تاسيسات ترتيب او ترميم کړي دي. دغه راز، د چين په دننه کې يې د ښارونو او کليو په هستوګنځايونو کې د يو اتیا سلنې په اندازه د عمومي خدمتي مرکزونو په دروازو، شپږ پنځوس سلنه خدمتي غرفو او اته دېرش سلنه تشنابونو کې له خنډه پاک چاپيريال او تاسيسات جوړ او ترتيب کړي دي او په چين کې به کابو ۸۵ ميليونه معلولين ترې ګټې واخلي.
د پارالمپيک د نړيوالې کمېټې د له خنډونو پاکو چارو کارپوهې ايليانا روډريګس په دې اند ده، چې پر له خنډه پاکو تاسيساتو سربېره، له خنډه پاک کولتور او نظر ډېر ارزښت لري. بېجينګ په ټولنې کې د معلولينو د فعالې همغږۍ لپاره نړۍ ته ښه مثال برابر کړی دی.
د بېجينګ د پارالمپيک ژمنيو لوبو د پای په مراسمو کې د رڼا، زړه ورتوب او مساوات د نښې په توګه د پارالمپيک ژمنيو لوبو مشال مړ شو، خو د نړيوالو په زړونو کې به تل ځليږي او دغه مشال به د يووالي او همکاريو په اړه د نړيوالو لارې روښانه کړي.
