دفاع وزارت: له غیر مسوولو کسانو د وسلو راټولولو بهیر پيل شوی

دفاع وزارت له نامسوولو کسانو څخه په سلګونه نظامي موټر راټول کړي دي. د دغه وزارت ویاند وایي، چې تر اوسه په څو ولایتونو کې له نامسوولو کسانو نه سلګونه موټر راټول کړای شوي دي. بل خوا، د دفاع وزارت ویاند وایي، چې له نامسوولو کسانو نه د وسلو د راټولولو بهیر هم پیل شوی دی. ورته مهال د نظامي چارو شنونکي د دغه بهیر هرکلی کوي او د نظامي موټرو او دولتي وسلو راټولول د جنایي جرمونو د کمېدو لپاره مهم بولي. له هېواده د امریکایي ځواکونو تر وتلو او د جمهوري نظام تر سقوط وروسته، د امریکا متحده ایالتونو دفاع وزارت د دغه هېواد کانګرس ته راپور ورکړی، چې په افغانستان کې د امریکا د اوه مېلیارد ډالرو په ارزښت وسلې او تجهیزات پاتې دي.