د چین د بهرنيو چارو وزارت وياند لين جيان د جولای په ۲۰مې نېټې يوې مطبوعاتي ناستې ته ويلي، چې د شانګهای همکارۍ سازمان د غړيو هېوادونو د خارجه وزيرانو غونډه به د جولای په ۲۳مې او ۲۴مې نېټې د قرغېزستان په چولپون اتا ښار کې ترسره شي او د چين خارجه وزیر وانګ يي به پکې ګډون او وينا وکړي.
نوموړي ويلي، وانګ يي به د يادې غونډې په ترڅ کې د شانګهای همکارۍ سازمان د غړيو هېوادونو له خارجه وزيرانو سره د اوسني نړيوال او سيمه ييز وضعيت، د شانګهای همکارۍ سازمان د راتلونکي پلان او په بېلا بېلو برخو کې د همکاريو په اړه د نظريو تبادلې وکړي او د شانګهای همکارۍ سازمان د سږنۍ بېشکېک سرمشريزې لپاره به بشپړ چمتوالی ونيسي.
