کورنیو چارو وزارت: هلمند کې پر پولیسو شوی برید څېړل کېږي

كورنيو چارو وزارت وايي، هغه ادعا څېړي، چې ګواكې په هلمند كې د بهرنيو ځواكونو په هوايي برید كې يو شمېر پوليسو ته مرګ ژوبله اوښتې ده. د دغه وزارت وياند نصرت رحيمي پر خپله فېسبوك پاڼه ليكلي، د دولت وسله والو مخالفينو تېره شپه د هلمند د نهر سراج ولسوالۍ پر يوې امنيتي پوستې بريد وكړ، چې د افغان او بهرنيو ځواكونو تر ځمكنيو او هوايي بريدونو لاندې راغلل او په ترڅ كې يې ګڼ شمېر وسله وال ووژل شول. د هغه په وينا، د لومړنيو معلوماتو له مخې، په جګړه كې اته پوليس هم وژل شوي او ۱۱ نور ټپيان دي. رحيمي وايي، داسې راپورونه خپاره شوي، چې ګواكې هلته د ناټو ځواكونو په هوايي برید كې پوليسو ته مرګ ژوبله اوښتې ده. نوموړى زياتوي، دا چې دا کسان د وسله والو طالبانو په بريد کې په نښه شوي او كه د بهرنيو ځواكونو له لوري، د کورنيو چارو وزارت او د امریکايي ځواکونو ګډ پلاوى پېښه څېړي او جزيات به يې ‌‌‌‌‌‌ډېر ژر له خلکو سره شريک شي.