ننګرهار کې د جګړو له امله ګڼې کورنۍ بیځایه شوې دي

د ننګرهار ولایت په یوشمېر ولسوالیو کې د داعش ډلې او طالب وسله والو ترمنځ خپلمنځي جګړو خلک له جدي ستونزو سره مخ کړې او ګڼ شمېر یې د خپلو سیمو پرېښودو ته اړشوې دي. په ولسي جرګه کې د ننګرهار استازي وايي، داعش او طالبان په سیمه کې په خپلمنځي جګړه بوخت دي، خو زیان یې یوازې ملکي وګړي ویني. په ولسي جر ګه کې د دې ولایت د استازو د معلوماتو له مخې د طالبانو او داعش ترمنځ د جګړو له امله شاوخوا لس زره کورنۍ بې ځایه شوې دي. دوی وایي، وسله وال طالبان او داعش ډله هڅه کوي پر هغو سیمو کنټرول ولري، چې د قیمتي ډبرو ترڅنګ پکې نور مهم کانونه دي او خلک اړ کوي چې خپل کورونه هغوی ته پرېږدي. په ولسي جرګه کې د ننګرهار استازي وايي، اوسمهال بې ځایه شوې کورنۍ داستوګنې لپاره مناسب ځای نه لري او له جدي اقتصادي ستونزو سره مخ دي، چې بیړنیو مرستو ته اړتیا لري.