زلمی خلیلزاد: سوله لومړیتوب دی، خو ټاکنو ته دې هم تیاری روان وي

سوله او سیاسي حل په افغانستان کې د امریکا لپاره لومړیتوب دی. د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد ویلي، ځینې کسان پوښتنه کوي چې اوسمهال په افغانستان کې د امریکا لپاره لومړیتوبونه څه دي. دده په خبره لا هم د افغانستان د سولې مذاکرات او سیاسي حل چې دغه هېواد ته دایمي ثبات راولي د امریکا لومړیتوب او ستره موخه ده. نوموړي ویلي چې د دې تر څنګ ټاکنې هم له پامه نه غورځول کېږي. خلیلزاد زیاته کړې ولسمشریزې ټاکنې د افغانانو حق دی او دوی باید پر خپل وخت د خپل ولسمشر د ټاکلو لپاره ټاکنې وکړي. د خلیلزاد په وینا له همدې امله افغانانو ته دا مشوره ورکوي چې د ټاکنو لپاره هم خپل تیاری ولري. دلته په افغانستان کې بیا ډېری سیاسي فعالین په دې باور دي، چې تر ټاکنو مخکې باید د سولې خبرې یوې پایلې ته ورسول شي او دا مسئله د دایمي ثبات د راتګ سبب کېدلی شي.