حامد کرزي؛ هلمند کې پر پولیسو د بهرنیو ځواکونو هوایي برید غندلی

د هېواد پخواني ولسمشر حامدکرزي یو ځل بیا په هېواد کې د بهرنیو ځواکونو د نظامي عملیاتو او هوایي بریدونو پر دوام خواشیني څرګنده کړې او په هلمند ولایت کې یې پر ملي پولیسو د بهرنیو ځواکونو هوایي برید په کلکو ټکو غندلی دی. د کرزي له مطبوعاتي دفتره په خپرې شوې خبرپاڼه کې راغلي، کرزی د نظامي عملیاتو او هوایي بمباریو دوام چې پرته له افغان وژنې بله نتیجه نلري، په کلکو ټکو غندي. سرچینه د حامد کرزي له قوله کاږي، په هېواد کې د روانې جګړې قربانیان دواړو خواوو ته یوازې افغانان دي نو له همدې امله له ټولو ښکېلو غاړو غواړي چې له جګړې او وینې توېدنې لاس واخلي او په هېواد کې د تل پاتې او سرتاسري سولې د ټینګښت لپاره د خبرو او تفاهم لار خپله او د بین الافغانی مذاکراتو هڅې ګړندۍ کړي.