سره له دې چې د ملي یووالي حکومت مشرتابه په ټاکنو کې د کم کارۍ او همدا راز د درغلیو د تورونو له امله د ټاکنو خپلواک کمېسیون پخوانۍ رهبري له دندې ګوښه کړه، خو ویل کېږي چې نوې رهبري هم تر دې دمه په خپلو چارو کې بریالۍ نه ده. وروسته له دې چې د ولسي جرګې تېرو ټاکنې د ملي یووالي حکومت او ټاکنو کمېسیون پر ارادو او فعالیتونو د ولس شک را ولاړ کړ، حکومت پرېکړه وکړه چې د کمېسیون لپاره نوې رهبري غوره کړي. په همدې موخه د ولسمشریزو ټاکنو ټولو نوماندانو د رایو له لارې دغه کمېسیون ته نوې رهبري وګومارله، خو اوس څارونکي بنسټونه پر دغه رهبرۍ هم د بې کفایتۍ او کمزوري مدیریت تور لګوي.
د کمېسیون د نوې رهبرۍ له کار څخه کابو درې میاشتې تېرېږي، خو لا یې هم چارې خورا ورو پرمخ ځي او په تازه پرېکړه کې په راتلونکو ولسمشریزو ټاکنو کې د بایومټریک سیسټم له کارولو هم په شا شوي دي. دغه سیسټم د کمېسیون تېرې رهبرۍ په خورا لوړه بیه پېرلی و او په خبره یې په دې سره به ټاکنې شفافې شي او درغلي به کمه شي. خو د کمېسیون نوې رهبري بیا وایي چې دغه سیسټم کارنده نه دی.
پر ټاکنو څارونکي بنسټونه بیا د ولسمشریزو ټاکنو د مهالوېش نه مراعتول له ناظرینو سره نه همغږي، په چارو کې د شفافیت نشتون او کمزوری مدیریت هغه مسایل بولي، چې کمېسیون یې د خپل کار په لومړي پړاو کې په عملي کولو کې پاتې راغلی دی. د ازادو او عادلانه ټاکنو اجرایوي رییس یوسف رشید ویلي، د ټاکنو کمېسیون په خپلو لومړنیو کارونو کې ناکام دی. د نوموړي په خبره، خلکو ته په عامه پوهاوي، د وسایلو په تنظیم، د کارکوونکو په روزنه او همدا راز د مهالوېش له مخې عمل نه کول هغه څه دي، چې د کمېسیون نوې رهبري پکې پاتې راغلې ده.
د یوسف رشید په باور، د ټاکنو کمېسیون نوې رهبري له ژمنو سره سره په خپلو کارونو کې ناکامه شوې ده. نوموړي ویلي: ((کمېسیون هغه څه چې ژمنه کړې وه چې باید ترسره یې کړي، ورباندې بریالي شوي نه دي، نو ځکه یې په لومړنیو چارو کې ناکام بللی شو)).
که څه هم د راتلونکو ټاکنو د تر سره کولو برخلیک روښانه نه دی، خو حکومت د رڼو او عادلانه ټاکنو تر سره کول د کمېسیونونو مسوولیت ګڼي او ټینګار یې دا دی چې ټاکنې باید د ستونزو ښکار نه شي. بل پلو د ټاکنو خپلواک کمېسیون بیا وايي چې دوی پر خپل وخت د ټاکنو تر سره کولو ته ژمن دي. د ټاکنو خپلواک کمېسیون رییس حوا علم نورستانۍ پرون په یوه مرکه کې ویلي وو، چې ولسمشریزې ټاکنې به پر خپل وخت ترسره کېږي.
نوموړې دا هم ویلي وو، چې امریکا ترې د ولایتي شورا د ټاکنو ځنډول غوښتي دي. د نورستانۍ په خبره، د امریکا د بهرنیو چارو وزارت مرستیالې الیس ویلز ورته ویلي، چې د وخت د کموالي او ستونزو له امله باید یوازې پر ولسمشریزو ټاکنو تمرکز وشي. خو نوموړې وايي چې دواړه ټاکنې په یوه وخت ترسره کېږي او دوی یې د ترسره کولو وړتیا لري.
بل پلو پرون طلوع نیوز د خپلو سرچینو په حواله لیکلي وو، چې په افغانستان کې د ملګرو ملتونو د مرستندویه دفتر یا یوناما مشر تادامیچي یاماموتو د کمېسیون له مشرتابه سره کتلي دي او له دوی یې د ولایتي شورا د ټاکنو ځنډول غوښتي دي. خو په یوناما کې رسمي سرچینو دغه راپور رد کړی دی.
ټاکنو کمېسیون داسې مهال د خپلو چارو د ښه ترسره کېدو او پر وخت د ټاکنو تر سره کولو خبره کوي، چې د شنونکو په باور ټاکنو ته کم وخت پاتې دی او ښایي دغه کمېسیون بریالی نه شي چې خپلې ژمنې عملي کړي.
