عرفان الله عرفان: موږ د خپلو ارزونو پایلې نن د ولسي جرګې غونډې ته وړاندې کوو

د ولسي جرګې د ریاست پر سر د را ولاړې شوې ستونزې د حل په موخه ټاکل شوی پلاوی وایي، خپلې پایلې به نن د ولسي جرګې په عمومي غونډه کې اعلان کړي. وړمه ورځ په ولسي جرګه کې د ریاست لپاره ټاکنې ترسره شوې، چې له مخې یې مير رحمان رحماني ددغه مجلس مشر وټاکل شو، خو د یو شمېر نوماندانو له مخالفت سره مخ شو او ټاکنې مشروع و نه بلل شوې. وکیلانو پرون اعتراض کړی و، او رحماني ته یې اجازه ور نه کړه چې د ریاست پر څوکۍ کښېني. له همدې امله یو پنځلس کسیز پلاوی ددغه ستونزې د حل په موخه وټاکل شو. د پلاوي ناظر غړی عرفان الله عرفان وايي، چې دوی د قضیې ټول تخنیکي اړخونه ارزولي دي او د خپلو موندنو پایلې به نن د ولسي جرګې په عمومي غونډه کې اعلان کړي.