د ولسمشریزو ټاکنو نوماندان وايي، د جوزا له لومړۍ نېټې وروسته، د ولسمشر غني کاري موده پای ته رسېږي او ستره محکمه دا صلاحیت نه لري، چې د هغه د واک موده وغځوي. تېره ورځ د ولسمشریزو ټاکنو نوماندانو یوه خبري غونډه لرله او په هغه کې یې له ولسمشر غني وغوښتل چې له واکه ګوښه شي. دغه نوماندان وايي، حکومت مسوولیت درلود چې په خپل وخت ولسمشریزې ټاکنې ترسره کړي او زمینه ورته برابره کړي، خو دا چې ټاکنې ځنډېدلې دي، نو باید موقت ولسمشر خپل کار پيل کړي.
د ولسمشریزو ټاکنو نوماند حنیف اتمر تېره ورځ په همدې تړاو جوړې شوې خبري غونډې ته وویل، ولسمشر غني د جوزا له لومړۍ نېټې وروسته خپلې دندې ته ادامه نه شي ورکولی او باید له واکه ګوښه شي. د نوموړي په خبره، د قانون له مخې ولسمشر د پنځم کال د جوزا تر لومړۍ نېټې ولسمشر دی او تر هغه وروسته به واک بل ولسمشر ته پرېږدي. حنیف اتمر وايي چې ولسمشر د سترې محکمې په فرمان غواړي خپله کاري موده وغځوي، چې دا کار یې د ولسمشریزو ټاکنو نوماندانو او ولس ته د منلو نه دی.
حنیف اتمر په خپلو خبرو کې یو ځل بیا ټینګار وکړ، چې د حکومت چارې دې یوه موقت ولسمشر ته وسپارل شي. نوموړي په دې اړه زیاته کړې: ((موږ دا وایو چې ولسمشر غني د جوزا تر لومړۍ نېټې ورهاخوا کار ته ادامه نه شي ورکولی. که هغه خپلې دندې ته ادامه ورکوي، نو باید له خپلې نوماندۍ تېر شي او که غواړي چې د ولسمشریزو ټاکنو نوماند وي، نو باید واک یوه موقت ولسمشر ته وسپاري)). هغه ټینګار کړی چې ولسمشر غني او نږدې کسان یې دې له غیر قانوني لارو د واک په ادامې سره د ولسمشرۍ څوکۍ ارزښت نه ټيټوي.
بل پلو د نوماندانو شورا بیا تېره ورځ د موقت حکومت طرحه د بهرنیو هېوادونو استازو ته وسپارله. په همدې مناسبت دغه غونډه د ولسمشریزو ټاکنو د نوماند احمدولي مسعود په کور کې جوړه شوې وه. په دغه غونډه کې د امريكا، برېټانیا، فرانسې، اېټاليا، روسيې، پاكستان، جاپان، هالنډ، هندوستان، تاجكستان، يوناما، ناټو، آغا خان بنسټ او د ولسمشریزو ټاکنو د نوماندانو شورا غړو ګډون کړی و. د احمدولي مسعود په خبره، دوی د قانون له مخې غواړي چې واک یوه موقت ولسمشر ته ولېږدول شي او هغه به ولسمشریزو ټاکنو ته زمینه برابروي.
د نوماندانو شورا د ټاکنو او سولې په برخه کې حکومت هم په کمکارۍ او بې کفایتۍ تورن کړ. د ولسمشریزو ټاکنو نوماند حنیف اتمر وویل، د قطر د سولې خبرې د حکومت د ناسم مدیریت او بې کفایتۍ له امله له ماتې سره مخ شوې او دا به د هېواد راتلونکې ته ښې پایلې و نه لري.
بل پلو ولسمشرۍ ماڼۍ بیا د نوماندانو د تېرې ورځې پر خبري کنفرانس غبرګون ښودلی دی. د ولسمشر یوه ویاند هارون چخانسوري ویلي، د ولسمشریزو ټاکنو نوماندانو کومه نوې خبره نه درلوده، بلکې تېرې خبرې یې تکرار کړې او له قانون سره په ټکر کې وې. د چخانسوري په خبره، د اساسي قانون د تفسیر صلاحیت یوازې او یوازې له سترې محکمې سره دی او افراد نه شي کولی په خپل زړه اساسي قانون تفسیر کړي.
نوماندان او حکومت داسې مهال یو بل له قانون څخه په سرغړونه تورنوي، چې څارونکي بنسټونه هم د راتلونکو ولسمشریزو ټاکنو او د حکومت د مشروعیت په اړه اندېښنه لري. دوی وېره ښيي چې ښايي د ټاکنو کمېسیون د ټاکنو په تنظیم بریالی نه شي او راتلونکې ټاکنې به تر تېرو ټاکنو لا له ستونزو او کشمکشونو ډکې وي.
