په دې وروستیو کې په افغانستان کې د داعش ډلې د فعالیت په اړه اندېښنې ډېرې شوې دي. د هېواد له ختیځه راپورونه وايي چې د کونړ او ننګرهار په ځينو لرو پرتو سیمو کې داعش ډله فعاله شوې ده او هڅه کوي خپل فعالیتونه پراخ کړي. وروستي راپورونه ښيي چې زرګونه وګړي د دغه ډلې د فعالیتونو له امله د خپلو مېنو پرېښودو ته اړ شوي دي.
تازه د روسیې د فدرال امنیتي ادارې ویلي چې د افغانستان په شمال کې د داعش ډلې زرګونه وسله وال ځای پر ځای شوي دي. د یادې ادارې رییس الکساندر بورتنیکف د تاجکستان په پلازمېنه دوشنبه کې د خپلو ملګرو هېوادونو د ملي امنیت له مسوولینو سره کتلي دي. دوی په سیمه کې د داعش پر پراختیا او په منځنۍ اسیا کې د ترهګرۍ پر شته ګواښونو بحثونه کړي دي.
د رشیا ټوډې د خبر له مخې، بوتنیکف ویلي چې داعش ډلې په عراق او سوریه کې سخته ماتې خوړلې ده، نو له همدې امله یې د نړۍ ځینو نورو سیمو ته مخه کړې ده. د نوموړي په خبره، د دې ډلې ډېری وسله افریقا او جنوبي اسیا ته تللي دي او هلته یې فعالیتونه پيل کړي دي. هغه زیاته کړې چې د داعش ډلې یوه ستره برخه له عراق او سوریې افغانستان ته راغلې ده او د دغه هېواد په شمالي ولایتونو کې مېشت ده.
یاد روسي چارواکي ادعا کړې چې د افغانستان په شمال کې د ځای پر ځای شوو داعشیانو شمېر پنځو زرو کسانو ته رسېږي او هڅه کوي له دغه ځایه منځنۍ اسیا او د پخواني شوروي اتحاد پولې وګواښي. بورتنیکف ویلي: ((د افغانستان په شمالي برخو کې د داعش او نورو وسله والو ترهګرو ډلو ځای پر ځای کېدل د جدي اندېښنې وړ دي. خراسان نومې ډله چې له داعش ډلې سره اړیکې لري، اوسمهال په یادو سیمو کې پنځه زره وسله وال لري)).
بورتنیکف ویلي، سره له دې چې داعش ډلې سخته ماتې خوړلې ده، خو لا هم دغه ډله ستر ګواښ ګڼل کېږي. نوموړي زیاته کړې: ((جهادي ډلو سخته ماتې خوړلې ده. په عراق او سوریه کې مات شول. خو لا هم ستر خطر شمېرل کېږي. اوس دوی غواړي داسې سیمو ته لاړ شي، چې هلته د سوریې د حکومت واک نشته دی. دوی تر ډېره هڅه کوي چې د کډوالو په مرکزونو کې پټ شي)).
دغه لوړپوړی روسي چارواکی داسې مهال په سیمه په تېره په افغانستان کې د داعش د فعالیتونو د پراختیا خبره کوي، چې تازه دې ډلې په هند او پاکستان کې خپل نوی ولایت اعلان کړی او له دې سره جوخت یې د افغانستان په ختیځ کې فعالیتونه هم پيل کړي دي. تر دې وړاندې روسي چارواکو ویلي وو، چې په افغانستان کې د امریکا په حضور کې داعش ډله پیاوړې کېږي، نو دلته د امریکایي ځواکونو حضور د پوښتنې وړ دی.
افغان حکومت تر دې وړاندې ویلي وو، چې داعش ډله یې د افغانستان په بېلابېلو برخو کې ځپلې ده، خو د روسیې د تازه ادعا په اړه یې تر دې دمه څرګندونې نه دي کړې.
