د سولې عالي شورا: له بهرنیانو سره د طالبانو لیده کاته د اندېښنې وړ دي

د سولې عالي شورا د بهرنیو هېوادونو له د استازو سره د طالبانو لیده کاته د اندېښنې وړ بولي. د سولې عالي شورا مرستیال عبدالخبیر اوچقون په تازه څرګندونو کې ویلي طالبان د بهرنیو هېوادونو له استازو سره ګوري خو د افغانانو غوښتنې لا هم نه اوري. دده په وینا له بهرنیانو سره د طالبانو لیده کاته نه یوازې دا چې د سولې له پروسې سره مرسته نه شي کولی بلکې دغه پروسه له لا ډېرو ستونزو سره مخ کوي. اوچقون وایي له دې لیده کاته د طالبانو موخه په مذاکراتو کې د لا ډېر امتیاز اخیستل دي. د طالبانو د قطر دفتر مشر په دې وروستیو ورځو کې د المان او اروپايي ټولنې له استازو سره په جلا جلا توګه کتلي دي. وسله وال طالبان وایي چې په دې لیدنه کې پر سوله او مذاکراتو خبرې شوې دي. طالبانو تر دې وړاندې د ترکمنستان، اندونيزيا، ملګرو ملتو او ځينو بنسټونو او هېوادونو له استازو سره لیده کاته لرلي دي.