په ولسي جرګه کې د اداري هیئت د ټاکنو پر سر ناندرۍ او کشمکشونه لا هم دوام لري. پرون شنبه د جوزا څلورمه د ولسي جرګې اتمه عمومي غونډه وه، خو د تړلو دروازو تر شا تر سره شوه. په ولسي جرګه کې تېره شنبه هغه وخت ناندرۍ پیل شوې، چې د دغې جرګې ریاست ته هېڅ نوماند هم ۵۰+۱ رایې خپلې نه کړې، خو موقت رییس میر رحمان رحماني د رییس په توګه وګوماره.
تېره شنبه د ولسي جرګې په تالار کې د رییس د ټاکلو لپاره د وکیلانو ترمنځ د رایې اچونه پیل شوه. ریاست ته میر رحمان رحماني او کمال ناصر اصولي نوماندان وو. په پای کې میر رحمان رحماني وکړای شوی، چې ۱۲۳ رایې خپلې کړي، خو د کمال ناصر اصولي رایې بیا پنځه پنځوسو ته رسېدې. د جرګې موقت رییس لومړی د حاضرو کسانو شمېر ۲۴۷ ښودلی و، خو وروسته یې وویل چې نصاب ۲۴۴ کسانو ته رسېږي. همدې مسئلې د وکیلانو غبرګون وپاراوه او په خبره یې که نصاب ۲۴۷ وي، نو میر رحمان رحماني پر دې نه دی بریالی شوی، چې ۵۰+۱ رایې پوره کړي، نو ځکه د دې اړتیا ده چې ټاکنې له سره وشي.
تر ناندریو وروسته، د دغه مسئلې د حل لپاره یو ۲۷ کسیز پلاوی وګومارل شو او ټاکل شوې وه چې دغه ستونزه حل کړي، خو پرونۍ د تړلو دروازو تر شا او بې پایلې غونډه ښيي، چې یاد پلاوی هم د ستونزې پر حل نه دی بریالی شوی.
بل پلو د ولسي جرګې ډېری غړي بیا په دغه جرګه کې له رامنځ ته شوي وضعیت څخه ستړي شوي دي. دوی وایي چې ولسي جرګه ځینې کسانو برمته کړې ده او په دې توګه یې هر ډول چې زړه وي، د ملت د کور او وکیلانو وخت ضایع کوي. په ولسي جرګه کې د فراه د خلکو استازې بلقیس روشن وایي، دواړه لوري دې سر ګرېوان ته کړي او د ملت وخت دې نه ضایع کوي. نوموړې وايي: ((دواړه لوري دې خجالت وباسي. دواړه لوري چې ځانونه د ملت استازي بولي، جنجالونه یې را ولاړ کړي، له همدې خپلو جنجالونو دې خجالت وباسي. د ملت کور دی او دوی حق نه لري چې هر څه برمته کړي)).
ځینې وکیلان بیا وایي چې د ولسي جرګې ریاست د ځینو نوماندانو لپاره پر ښه کارو بار بدل شوی دی. د دوی په خبره، ځینې وکیلان د دې لپاره چې ټاکنې دویم پړاو ته لاړې شي او دوی ته د نوماندۍ چانس برابر شي او ځینې بیا د پیسو په خاطر غواړي ناندرۍ دوام وکړي. د ولسي جرګې غړی ظهیر الدین اغا وایي، ځينې د پیسو، ځینې د نوماندۍ او ځینې د قومي مسایلو لپاره دغه ستونزې ته لمن وهي. نوموړی وايي: ((یوشمېر وکیل صاحبان غواړي چې ټاکنې بل پړاو ته لاړې شي او دوی ته د نوماندۍ چانس برابر شي. یوه ډله بیا فکر کوم د پیسو او دې خبرو په خاطر غواړي موضوع ته لمن وهي او یوه ډله نور بیا قومي بحثونو ته لمن وهي)).
بل پلو په ټولنیزو رسنیو کې د کاروونکو ترمنځ او سیاسي فعالین بیا په ولسي جرګه کې روانې ناندرۍ د هېواد په ګټه نه بولي. دوی پر ولسي جرګه او وکیلانو نیوکه کوي چې د ستونزې د حل پر ځای ستونزې ته لمن وهي او باید د ریاست پر سر را ولاړ شوی کشمکش ژر تر ژره پای ته ورسېږي.
هڅه مو وکړه چې په دې اړه د حکومت نظر هم واخلو، خو بریالي نه شو. بلخوا د ولسي جرګې غړی میر رحمان رحماني بیا ځان رییس بولي او نږدې کسان یې رسنیو ته دغه ستونزه حل شوې بولي. خو کمال ناصر اصولي بیا په تازه څرګندونو کې ویلي، چې نه ده او نه هم میر رحمان رحماني د ولسي جرګې د ریاست لپاره پنځوس جمع یو رایې تر لاسه کړې دي. لا روښانه نه ده چې د ریاست پر سر به دغه ناندرۍ تر کومې روانې وي.
