قریشي: د سیمې ثبات د افغانستان له امن سره تړلی دی

د پاکستان د بهرنیو چارو وزیر شاه محمود قریشي ویلي، افغانستان د سیمې یو مهم هېواد دی، د ګاونډیو هېوادونو امنیت او د سیمې ثبات د افغانستان له امن سره مستقیم تړاو لري. قریشي دغه راز په افغانستان کې د سولې پروسې ته په اشارې ویلي، پاکستان تل پر بین الافغاني خبرو ټینګار کړی دی او کوي یې، ځکه د حل یوازینۍ لار سیاسي ډیالوګ دی. نوموړي نن په ملتان کې یوې غونډې ته په خبرو کې ویلي، پاکستان به هڅه وکړي څو د افغانستان د سولې په پروسه کې اسانتیاوې رامنځته کړي او هیله یې څرګنده کړه چې نور هېوادونه به هم په دې ګډ مسوولیت کې ورګډ شي. پاکستان تل د افغان سولې د ملاتړ خبره کړې او په دې برخه کې یې د ډېرې مرسته ډاډ ورکړی دی خو تر اوسه یې عملي اقدامات نه ترسترګو کېږي.