لاس انجلس ټایمز: پر ډیورنډ کرښه اغزن تار غځولو د خلکو ژوند ګډوډ کړی

د لاس انجلس ټایمز په نامه امریکایي ورځپاڼې لیکلي چې پر ډیورنډ کرښې اغزن تار غځولو د یادې کرښې دواړو غاړو ته د خلکو ژوند تریخ کړی دی. ورځپاڼه وایي، د ډيورند کرښې دواړه غاړې اوسېدونکي پر ځمکو په ګډه کار کوي او دواړه غاړي یو بل سره کورني تړاونه او خپلوۍ لري، چې له یو بله نه جلا کېدونکي دي. ورځپاڼې د سيمې د يوه کروندګر سید ګل له قوله ویلي، پاکستاني پوځ پر خپله ځمکه کې چې کرښې ته نږدې پرته ده له کاره منع کړی دی خو په خبره یې دوى هېڅکله دا کرښه د پولې په توګه په رسميت نه پېژني. ورځپاڼه وايي دا اغزن تار زرګونه کورنۍ چې سره ګډ فرهنګ، ژبه او دين لري له يوه بله جلا کړې دي. پاکستاني چارواکي وايي دا اغزن تار به د ترهګرو د تګ راتګ مخه ډب کړي. خو منتقدين وايي طالبان له دغو لارو تګ راتګ نه کوي.