کابل ښار د نوي کال له پیل سره سم، د خونړیو جنایي پېښو له یوې څپې سره مخ دی. هره ورځ د کابل په نږدې هره امنیتي حوزه کې جنایي پېښې رامنځ ته کېږي او کابل ښاریان یې له سختو اندېښنو سره لاس او ګرېوان کړي دي. کابل ښار د جنایي جرمونو د ډلو او بانډونو لپاره په انساني ژوند د لوبو پر ډګر بدل شوی دی. سوداګر، عام خلک، دولتي کارکوونکي، خبریالان، دیني علما ان ماشومان په بې رحمانه توګه وژل کېږي؛ خو حکومتي چارواکي کوم اغېزناک ګام نه اوچتوي.
وړمه شپه د کابل ښار په زړه کې وسله وال یوه کور ته د ننه کېږي، چې د ښځو او ماشومانو په ګډون، د یوې کورنۍ اووه غړي وژني. ځايي امنیتي مسوولین سبا له دې موضوع خبرېږي او په اړه یې پلټنې کوي. له دې یوه ورځ وړاندې په کابل ښار کې وسله وال دیني عالم شبیر احمد کامه وال وژني. تر دې یوه ورځ وړاندې د کابل ښار په تر ټولو امنه سیمه کې یو ملي سوداګر په رڼا ورځ په ډزو وژل کېږي. د تېرې جمعې په ورځ نوموتی دیني عالم مولوي ریحان د جومات په منځ کې د چاودېدونکو توکو په مرسته وژل کېږي.
دا هغه پېښې دي چې تر رسنیو رسېږي. د دې تر څنګ لسګونه داسې پېښې کېږي، چې پر هغه باندې رسنۍ نه خبرېږي او یا پټېږي. کابل ښار په دې وروستیو کې د وېرې او وحشت په ښار اوښتی دی، خو امنیتي مسوولین د ناامنۍ د کابو کولو لپاره هېڅ راز اقدام نه کوي.
نه یوازې جینایي پېښې په کابل کې ډېرې شوې دي، بلکې ترهګریزو پېښو هم له خلکو ارام اخیستی دی. پرون سهار د حج او اوقافو وزارت پر یوه موټر چاودنه وشوه او ډېرو خلکو ته یې مرګ ژوبله واړوله.
د امنیتي مسایلو شنونکی لطف الله مشعل بیا په امنیتي ادارو کې فساد د ټولو ناامنیو او جنایي پېښو د ډېرېدو لامل بولي. د نوموړي په خبره، د امنیت د تامین لپاره باید د امنیتي ادارو په راس کې پیاوړي او مسلکي کسان وګومارل شي او تر څنګ یې باید په دغو ادارو کې د فساد د مخنیوي لپاره تر شعار ور هاخوا عملي ګامونه اوچت کړل شي.
مشعل همدا راز د ناامنیو د کنټرول په برخه کې حکومت په ناکامۍ تورنوي او وايي چې د ملي یووالي حکومت مشران بریالي نه شول، چې د امنیت د تامین په برخه کې خپلې ژمنې عملي کړي. نوموړی زیاتوي: ((په لومړي سر کې د امنیت د تامین شعارونه ورکول کېدل، خو اوس هر څه سرچپه شوي دي. جګړې او ناامنۍ د کابل ښار زړه ته را رسېدلې دي)).
بلخوا په ارګ کې پرون د کابل ښار د امنیتي وضعیت د ارزولو لپاره غونډه جوړه شوې وه. ولسمشر غني د دې غونډې مشري کوله او د کابل د امنیت په اړه یې د امنیتي مسوولینو راپورونه او پلانونه واورېدل. هغه سپارښتنه کړې چې امنیتي مسوولین دې د کابل امنیت خپل لومړیتوب وګرځوي او د جنایي شبکو او جرمي ډلو ټپلو په نیولو کې دې هر اړخیزه هڅه کوي. غني ټینګار کړی چې د اختطاف کوونکو او جرمي شبکو نیول او تعقیب باید د امنیتي مسوولینو لومړیتوب وي.
یوازې امنیت نه دی چې ولس ځوروي. د بیو لوړېدل، د بهرنیو اسعارو پر وړاندې د افغانۍ ټېټدل، د ولسي جرګې د ریاست پر سر کشمکش او هلته د پراخ فساد تورونه، د سرپرستانو له لوري د وزارتونو اداره کول او سلیقوي ادلون بدلون، د سولې د خبرو نامعلوم وضعیت، د داعش ډلې د حضور پراخېدل او د راتلونکو ټاکنو نامعلوم برخلیک هغه څه دي چې افغانانو ته یې ډېرې اندېښنې پیدا کړې دي.
