عامې روغتیا وزارت ویلي، په ماشومانو کې د وینې د سرطان زیاتېدو اندېښمن کړي یو.
د وینې په سرطان اخته دوولس کلن ماشوم لطفالله چې د درملنې لپاره له بادغیسه د کابل د اندراګاندي د ماشوم د روغتیا روغتون ته راوړل شوی او له اوو میاشتو راهیسې په دغه روغتون کې بستر دی، ويلي چې تر پنځم ټولګي ېې زده کړې کړې دي، خو د سختې ناروغۍ له امله نور ونه توانېد چې ښوونځي ته ولاړ شي.
هغه ویلي: «لومړی مې پښو او لاسونو درد کاوه، له بادغیسه هرات ته راغلو، د هډوکي د وینې له معاینې وروسته یې وویل، وینه دې میکروبي شوې، بیا کابل ته راغلم، اووه میاشتې کېږي چې دلته بستر یم، ۵۰۰۰ افغانۍ مې ولګېدې، ۹ واکسینه مې واخیستل، یو یې پاتې دی، له هغې وروسته بیا معاینه کېږم چې څومره نتیجه یې ورکړې ده».
په دغه روغتون کې چې هرڅومره د وینې په سرطان اخته ماشومان بستر دي، اکثره یې له بېلابېلو ولایتونو راوړل شوي دي.
د وینې سرطان په ماشومانو کې د شایع کېدونکي سرطان نمونه ده او په هغو خطرناکو ناروغیو کې شامل دی، چې ریښه یې د وینې په سلولونو او د هډوکو په مغز کې ده.
له وریو او پوزې د دوامدارې وینې راتلل، د هډوکو دوامدار دردونه، دوامداره تبه، مکرر عفونت، په ورنونو او اوږو کې د پوستکي راوتل، دوامداره ستومانتیا او د انرژۍ کموالی، په ماشومانو کې د وینې د سرطان نښې دي.
د اندراګاندي د ماشوم د روغتیا روغتون د ماشومانو د داخله ناروغیو متخصص ډاکتر محمد عارف حسنزي ازادي راډیو ته ویلي، که په ماشومانو کې د وینې سرطان په وخت تشخیص او درملنه یې وشي، د درملنې وړ دی.
هغه ویلي: «که یو ماشوم هر ځل تبه کوي او په هېڅ ډول انتي بیوتیک نه ښه کېږي، دا یو اشتباهي حالت دی او باید تشخیص شي، که تشخیص هر څومره ژر وشي، نتیجه به یې ښه وي، درملنه یې دوه برخې لري، یوه دا چې ناروغ ته درمل ورکول کېږي او بله یې ناروغ ته شعاع ورکول دي چې په خواشينۍ سره په دغه روغتون کې نشته».
په ورته وخت کې د عامې روغتیا وزارت د سرطاني ناروغیو د کنټرول د پروګرام مسوول میهن عبدالله ويلي، هره ورځ د وینې په سرطان لس یا پنځلس اخته ماشومان د اندراګاندي روغتون ته مراجعه کوي.
نوموړي دغه راز ویلي: «زموږ هڅه دا ده چې په دغه روغتون کې د سرطان د مرکز یا وارډ ډېر تجهیز او ملاتړ وکړو او همدارنګه د ثدیه د سرطان د تشخیص مرکزونه چې د کابل په استقلال او د هرات په ولایت کې دي، هغه هم تجهیز او پیاوړي کړو».
