د طالبانو د رهبرۍ سیاسي مرستیال او د قطر دفتر مشر ملا عبدالغني برادر د طالبانو د مذاکراتي ټیم په ملتیا د روسیې په رسمي بلنه مسکو ته تللی او تمه ده چې هلته نن د روسیې او افغانستان د سل کلنو ډیپلوماټیکو اړیکو په یاد غونډه کې ګډون وکړي.
د طالبانو د سیاسي دفتر ویاند سهیل شاهین له رسنیو سره په خبرو کې ویلي، چې دوی به له ځینو افغان سیاسیونو سره هم په یوه بینالافغاني غونډه کې ګډون وکړي.
هغه ویلي، ملا عبدالغني برادر، شېرمحمدعباس ستانکزی، شهاب الدین دلاور، سیدرسول حلیم، ملا محمد فاضل، مولوي امیرخان متقي، ملا عبدالطیف منصور، مولوي عبدالسلام حنفي، قاري دین محمد حنیف، سهیل شاهین، ملاخیرالله خیرخوا، مولوي محمد نبي عمري، ملا نورالله نوري، مولوي محمدحسن هغه کسان دي چې په یاده غونډه کې د ګډون په موخه مسکو ته تللي دي.
ویل کېږي چې د افغان سیاسیونو له اړخه به په دغه غونډه کې پخوانی ولسمشر حامد کرزی او د سولې عالي شورا مشر کریم خلیلي هم ګډون وکړي او ټاکل شوې چې طالبان به د ښاغلي کرزي په مشرۍ له افغان پلاوي سره هم د افغان سولې او راتلونکي په اړه خبرې وکړي.
مسکو ته د طالب پلاوي سفر داسې مهال دی چې ټاکل شوې په راتلونکو څو ورځو یا اونیو کې په دوحه کې د امریکا او طالب استازو ترمنځ د افغان سولې په تړاو اووم پړاو خبرې هم وشي.
