د ولسمشر غني پخواني سلاکار حبیب احمدزي ويلي، کومې څرګندونې يې چې کړې، له هغو به په شا نه شي او که په دې تړاو کومه تحقيقاتي اداره جوړه شوه، هغې ته به په دې اړه مدارک او اسناد هم وړاندې کړي.
د راپورونو له مخې، جنرال حبيب الله احمدزي چې د ولسمشر غني د ځانګړي امنيت پخوانى سلاکار و، څو ورځې مخکې له يوه خصوصي ټلوېزيون سره په مرکه کې ادعا وکړه، چې د ارګ دننه د سلاکارانو، وزيرانو او وکيلانو داسې کړۍ شته، چې د فحشا لپاره کار کوي. نوموړي د خپلې استعفا دلايل په کاري چارو کې لاسوهنه، په ارګ کې فحشا ته د ځانګړې کړۍ هڅونه او له ډيموکراسۍ څخه د هغوى ناسم برداشت بللی دی.
دا په داسې حال کې ده چې وړمه ورځ د ولسمشر وياند هارون چخانسوري د خبري ناستې پر مهال ويلي وو، چې د جنرال حبيب احمدزي څرګندونې پر شخصي انګېزو ولاړې دي او هغه يې د څوکۍ او موقف اخيستو په خاطر کړې دي.
چخانسوري ويلي وو، د حل لاره دا نه وه چې نوموړى دې د رسنيو له لارې پر خلکو تورونه ولګوي، بلکې په دې اړه که اسناد لري، لويې څارنوالۍ ته یې دې وړاندې کړي.
خو د ځانګړي امنيت په چارو کې د ولسمشر سلاکار حبيب الله احمدزي د ولسمشر د وياند چخانسوري د خبرو په غبرګون کې پژواک خبري اژانس سره د خبرو پر مهال د دې پوښتنې په اړه چې ايا په ارګ کې د فحشا په اړه کوم اسناد لري؟ ويلي: «بعضې وضاحتونه داسې دي چې د ډېرو خلکو په عزت باندې تمامېږي. دغه يې جايګاه نه ګڼم، فکر کوم کله چې بيا تحقيقاتي اداره جوړه شوه، هغوی ته به مدارک هم ورکړو، اسناد به هم ورکړو».
