د ملي یووالي حکومت اجرایه رییس په ارګ کې د اخلاقي فساد په اړه د راپورته شوو ادعاوو په اړه ويلي، چې په دې تړاو دې جدي څېړنې وشي.
عبدالله عبدالله تېره ورځ د وزیرانو شورا په غونډه کې په دې اړه د اندېښنې په ښودلو سره وویل، چې د اخلاقي فساد په اړه ادعاوې پر ټولنه منفي اغېز کوي او په خبره یې چې له دې قضیې سره باید سیاسي چلند ونه شي.
هغه په دې اړه د راپورونو تر خپرېدو وروسته ویلي: «دا ډول اوازې او خبرې کېدای شي وجود ولري، خو په دې اړه قضاوت نشم کولای».
دا په داسې حال کې ده چې په امنیتي چارو کې د ولسمشر غني پخواني سلاکار حبیب الله احمدزي په خپلو تازه څرګندونو کې ادعا کړې، چې د غني سلاکار فضلي د پارلماني ټاکنو ځینې ښځينه نوماندانې چې له ۶۰۰ څخه کمې رایې یې وړې وې، د نامشروع اړیکو له مخې یې ولسي جرګې ته کامیابې کړې دي.
عبدالله ټینګار کړی چې د خلکو د باور خپلولو او د افغانستان د اسلامي جمهوري نظام اعتبار ته د زیان رسېدو د مخنیوي په موخه باید په دې اړه خپلواکې او بې پرې څېړنې وشي.
عبدالله زیاته کړې: «که له دې مسئلې سره سیاسي چلند وشي، دا به د افغان مېرمنو سالم حرکت ته یوه لویه ضربه وي، په داسې حال کې چې افغان مېرمنې په ټولنه او د خلکو په منځ کې خاص ځای لري او په پوره ایماندارۍ او ژمنې سره د خلکو خدمت کوي. دغه مسئله رښتیا هم زیان رسوي چې بیا به د جبران وړ نه وي».
خو د ولسمشرۍ ماڼۍ ویاند هارون چخانسوري بیا وړمه ورځ په ارګ کې د اخلاقي فساد په اړه د ولسمشر غني د پخواني سلاکار جنرال حبیب الله احمدزي ادعاوې بې اساسه او دروغ بللې دي.
چخانسوري له لویې څارنوالۍ هم وغوښتل چې د یادې ادعا د ثابتولو لپاره له حبیب الله احمدزي څخه پلټنې وکړي او له احمدزي څخه یې هم وغوښتل چې په دې اړه خپل اسناد او شواهد لویې څارنوالۍ ته وسپاري.
جنرال حبیب الله احمدزی مخکې په امنیتي چارو کې د ولسمشر غني سلاکار و، چې د ولسي جرګې تېرو ټاکنو ته یې تر نوماندېدو مخکې له یادې دندې څخه استعفا وکړه، خو هغه د ولسي جرګې په ټاکنو کې بریالی نه شو.
تر دې مهاله معلومه نه ده چې ایا لویې څارنوالۍ له نوموړي څخه د ده د ادعا په اړه د اسنادو او شواهدو غوښتنه کړې که نه.
