د څېړنې او ارزونې اداره: تر نیم میلیون ډیر افغانان د نشه یي توکو له عوایدو ګټه اخلي

د افغانستان د څېړنې او ارزونې اداره وايي چې نيم ميليون افغانان د نشه یې توکو پر کرهڼې، توليد او قاچاق بوخت دي او له دغې لارې په ترلاسه شوي عاید خپل ژوند چلوي. دغه شمير د افغان امنيتي او دفاعي ځواکونو له شمير څخه لوړ دی. د دغې نوې څېړنې پر اساس د سولې په روانو مذاکراتو کې د نشه یي توکو ستونزه له پامه غورځول شوې په داسې حال کې چې د نشه یي توکو کاروبار د سولې په هر ډول احتمالي تړون اغیز لري. په افغانستان کې په زرهاو کسان د کوکنارو پر کښت او د نشه یي توکو پر توليد او قاچاق بوخت دي او له دغې لارې خپل ژوند پر مخ وړي. د ملي او نړيوالو بنسټونو له خوا په بېلابېلو خپرو شویو راپورونو کې د نشه یي توکو کاروبار د طالبانو تر ټولو لويه مالي سرچينه ښودل شوې ده. د افغانستان د څېړنې او ارزونې ادارې په خپلې تازه څېړنه کې ويلي، چې نيم ميليون افغانان په دايمي ډول د نشه یي توکو په کښت، توليد او قاچاق بوخت دي. د افغانستان د بيارغونې له پار د امريکا څېړونکې ادارې یا سيګار د وروستي راپور په حواله، په افغانستان کې د جګړو له ډیرېدو سره د نشه یي توکو توليد او قاچاق د دغه هېواد لپاره د تر ټولو ستر ګواښ په توګه شمېرل کيږي.