نیویارک ټایمز: تېره اوونۍ ګڼو ملکي او نظامي افغانانو ته مرګ ژوبله اوښتې

نیویارک ټایمز ورځپاڼه وايي چې، په تېره یوه اوونۍ لږترلږه ۵۰ تنه امنیتي ځواکونه او ۱۹ ملکیان وژل شوي دي. ورځپاڼې ویلي دا یوازې هغه شمېرې دي چې د نیویارک ټایمز خبریالانو پرې راپورونه ورکړي دي، په راپور کې د مرګ ژوبلو هغه شمېرې نه دي ښودل شوي، چې افغان حکومت او طالبانو یې یو بل ته د اړولو ادعا کړې ده. د نیویارک ټایمز په خبره تر ټولو خونړی برید، په ارزګان کې و چې پکې طالبانو د شهید حساس ولسوالۍ مرکز هدف وګرځاوه او ۱۹ سرتېرو ته یې پکې مرګ ژوبله واړوله. ورځپاڼې د جون تر شپږمې په غور، پکتیا، لوګر، بغلان، کابل، کندز، میدان وردګ، هرات، جوزجان، سرپل، غزني او ارزګان کې د مرګ ژوبلو شمېرې خپرې کړي. د نیویارک ټایمز په دې راپور کې چې د مرګ ژوبلو شمېرې پکې یادې شوي، د کمکي اختر درې ورځې هم شاملې دي. طالبانو ادعا کړې چې په اختر کې یې په افغان پوځیانو برید نه دی کړی. خو دفاع وزارت هم په همدې موده کې د یو شمېر وسله والو مخالفینو د وژلو شمېرې خپرې کړي دي. په افغانستان کې داسې وخت د خلکو د وژنې راپورونه خپرېږي چې د دغه هېواد د سولې او پخلاینې په سر هڅې روانې دي او معلومه نه ده چې څه وخت به د سولې پروسه بریالۍ شي.