ناټو له افغان ځواکونو د خپل ملاتړ ژمنه بیا تازه کړې

د هېواد د ماليې وزارت وایي، ناټو هغه ژمنه بیا تازه کړې چې تر ۲۰۲۴ میلادي کال پورې به هر کال افغان ځواکونو ته پنځه میلیارده ډالر د مرستې په توګه ورکوي. له مالیې وزارته په خپرې شوې خبرپاڼه کې راغلي، ناټو له دې مخکې هم له افغان ځواکونو سره هرکال له ۲.۵ څخه تر ۵ میلیارډ ډالرو پورې مرسته کوله او دا لړۍ به تر راتلونکو نورو پنځو کلونو پورې دوام وکړي. دا پرېکړه د ناټو غړو هیوادونو تیره اونۍ په بروکسل کې کړې ده. د ناټو چارواکو ویلي، چې له افغان ځواکونو سره د دغه سازمان مالي مرستې، په افغانستان کې د سولې له ټينګېدو سره مرسته کولی شي. په ورته وخت کې د هېواد د مالیې وزیر محمد همایون قیومي ویلي، د ناټو مرستې د افغان ځواکونو روحیه لا پیاوړې کوي خو ټینګار یې کړی دی چې دوی به د ځان بسیاینې لپاره د خپلو اقتصادي پلانونو چټکتیا ته دوام ورکړي.