په داسې حال کې چې په دې وروستیو کې افغانۍ د بهرنیو اسعارو او په ځانګړې توګه د ډالر پر وړاندې په بې سارې توګه ارزښت له لاسه ورکړی، د افغانستان بانک رییس وايي، چې د افغانیو د بې ثباته کېدو علت په هېواد کې روان سیاسي او امنیتي بحران دی.
د دغه بانک رییس خلیل صدیق، چې تېره ورځ د مشرانو جرګې استجوابیه غونډې ته بلل شوی و، ویلي چې له یوې خوا په وارداتو او صادراتو کې بېلانس نشته او له بل لوري جنګ او سیاسي مسایلو پر اقتصادي وضعیت ناوړه اغېز کړی دی.
هغه زیاته کړې چې د افغانستان اقتصاد په لوړه کچه ډالري شوی او اوسمهال د هېواد په ډېریو بازارونو کې معاملات د افغانۍ پر ځای په ډالرو کېږي.
بلخوا د مشرانو جرګې اداري هیئت او غړي نیوکه کوي، چې افغانۍ په بې سارې توګه د بهرنیو اسعارو په ځانګړې توګه د ډالرو پر وړاندې خپل ارزښت له لاسه ورکړی دی. دوی ویلي، پر نورو ستونزو سربېره هره ورځ له افغانستانه په پرېمانه پیمانه ډالر قاچاق کېږي.
د دغې جرګې لومړي مرستیال محمدعلم ایزدیار ویلي: «خدای شاهد دی چې زه له یوه بندره راتلم، راته ویې ویل چې ډالر په موټرونو کې ځای پر ځای کېږي او پرته له دې چې وکتل شي، له هېواده بهر وځي».
خو د افغانستان بانک د بهرنیو اسعارو په ځانګړې توګه ډالرو پر وړاندې د افغانیو د بیې را لوېدو علت، سیاسي او امنیتي بې ثباتۍ، د صادراتو او وارداتو ترمنځ د بېلانس نشتوالی او ځینې نور عوامل بللي دي.
د دغه بانک د رییس خلیل صدیق په خبره، دا مهال په وارداتو او صادراتو کې بېلانش نشته، چې د افغانیو د بې ثباتۍ یو ستر علت هم دا دی.
هغه زیاته کړې: «د وارداتو او صادراتو ترمنځ مو لوی کسر شتون لري، نو له همدې کبله د اقتصاد د قانون له مخې موږ نه شو کولای ادعا وکړو چې پیسې مو دې په داسې حالت کې ثبات ولري».
د افغانستان بانک مسوولینو په دې غونډه کې ویلي، چې تېر کال افغانستان د ۷ اعشاریه ۴ میلیاردو ډالرو په ارزښت واردات درلودل، په داسې حال کې چې یوازې د ۸ سوو میلیونو ډالرو په ارزښت صادارت شوي دي.
د افغانستان بانک ريیس دغه راز زیاتوي، چې جنګ، امنیتي او سیاسي بې ثباتۍ هم د افغانستان پر اقتصادي وضعیت ناوړه اغېزه کړې ده.
