د ولسي جرګې غړي: حکومت زموږ په چارو کې د مداخلې حق نه لري

له نږدې يوې میاشتې وروسته لا هم د ولسي جرګې د مشر د ټاکلو پر سر راپورته شوې ناندرۍ پای ته نه‌ دي رسېدلي، خو اوس چې د ياد کړکېچ د هواري لپاره د حکومت او سترې محکمې د مداخلې خبرې کېږي، د دغې جرګې يو شمېر غړي وايي چې د جرګې د داخلي اصولو له مخې حکومت د دوی په چارو کې د هېڅ ډول مداخلې حق نه ‌لري. په ولسي جرګه کې د دغې راپورته شوې کشالې د هواري لپاره له نږدې يوې میاشتې راهیسې هڅې روانې دي، خو لاهم دغه ستونزه نه ‌ده هواره شوې. دغې موضوع د ګڼو نورو بنسټونو ترڅنګ د افغانستان د ازادو او عادلانه ټاکنو بنسټ یا فیفا اندېښنې هم راپارولي او دغه بنسټ د افغانستان په ولسي جرګه کې روان وضعیت ناهیلی کوونکی بولي. فیفا د ولسي جرګې له وکیلانو وغوښتل چې د جرګې د ریاست له حیثیتي کولو، فساد او له قومي او سمتي بحثونو ډډه وکړي. د دغه بنسټ په باور که د ولسي جرګې د مشر د ټاکلو پر سر راپورته شوی کړکېچ ژر تر ژره حل نه‌ شي، د افغانستان په پارلمان به د خلکو باور زیانمن شي.