پر ټاکنو د څار ادارې وایي، سترې محکمې ته د ولسي جرګې د ریاست پر سر د راپورته شوې ستونزې راجع کول به تازه بحران رامنځته کړي.
د افغانستان د ازادو او عادلانه ټاکنو بنسټ یا فیفا وایي، چې د ولسي جرګې د ریاست پر سر رامنځته شوې ستونزه باید په خپله د ولسي جرګې د غړو له لوري حل شي او سترې محکمې ته د دې لانجې راجع کول د مقننه قوې حیثت ته زیان رسوي.
فیفا دغه راز وایي چې د ولسي جرګې د ریاست څوکۍ پر سر د ناندریو دوام اندېښمن کړي او د ورته وضعیت دوام ښایي د ولسمشریزو ټاکنو د ځنډ سبب شي.
دا په داسې حال کې ده چې په ولسي جرګه کې د ریاست د څوکۍ پر سر د راپورته شوو جنجالونو له دوام څخه شاوخوا یوه میاشت تېرېږي، خو لاهم دغې ستونزې ته د حل لاره نه ده موندل شوې. په دې وروستیو کې داسې راپورونه خپاره شوي، که د ولسي جرګې غړي دې ستونزې ته په راتلونکو څو ورځو کې د حل لار پیدا نه کړي، نو ولسمشر به له سترې محکمې څخه د دې مسئلې د حل په موخه مرسته وغواړي.
خو د ازادو او عادلانه ټاکنو بنسټ یا فیفا بیا وايي، په پارلمان کې رامنځته شوی بحران باید په خپله د ملي شورا استازي حل کړي او سترې محکمې ته د دې لانجمنې دوسیې راجع کول به د مقننه قوې حیثت ته زیان ورسوي.
د فیفا غړي حسیب معترف ویلي: «له پارلمان څخه بهر د دغې ستونزې راجع کول به د سترې محکمې حیثیت ته زیان ورسوي».
فیفا اندېښنه ښودلې چې په ولسي جرګه کې رامنځته شوی بحران له یوې خوا د ولسي جرګې حیثیت او اعتبار ته زیان رسوي او له بلې خوا د نظام یوه مهمه قوه فلج شوې ده.
دوی وايي، د ورته وضعیت دوام په خپله د بحران پراختیا او فساد ته لار هواروي او راتلونکې ولسمشریز ټاکنې هم اغېزمنولی شي.
د فیفا ویاندې مروې امیني ویلي: «پارلمان د خپلمنځي بحران له کبله د حکومت پر کړنو هېڅ ډول څارنه نه لري، د دغه ډول وضعیت دوام په خپله د بحران پراختیا او فساد ته لاره هواروي او که دغه ستونزه ژر حل نه شي، راتلونکې ولسمشریزې ټاکنې هم اغېزمنولی شي».
فیفا له قانوني لارې د رامنځته شوې ستونزې هواری اساسي حللار بولي، خو وړاندیز کوي چې له هر ولایت څخه دې یو استازی وټاکل شي او یوه ۳۶ کسیزه کمېټه دې جوړه او د دې کمېټې د تصمیم په صورت کې دې رامنځته شوې ستونزې ته نهايي حللار پیدا کړي.
د افغانستان د ازادو او عادلانه ټاکنو بنسټ یا فیفا داسې مهال په ولسي جرګه کې د رامنځته شوي بحران په اړه اندېښنه ښيي، چې په دې جرګه کې لا هم پر همدې موضوع جنجال روان دی.
