فیفا: پارلمان کې رامنځته شوی بحران دې خپله استازي حل کړي

د افغانستان د ازادو او عادلانه ټاکنو بنسټ یا فیفا وايي، په پارلمان کې رامنځته شوی بحران باید په خپله د ملي شورا استازي حل کړي او سترې محکمې ته د دې لانجې راجع کول به د مقننه قوې حیثیت ته زیان ورسوي. فیفا اندېښنه ښيي، چې په ولسي جرګه کې رامنځته شوی بحران له یوې خوا د ولسي جرګې حیثيت او اعتبار ته زیان رسوي او له بلې خوا د نظام یوه مهمه قوه فلج شوې ده. د فیفا ویانده مروه امیني وايي، چې د ورته وضعیت دوام په خپله د بحران پراختیا او فساد ته لار هواروي او راتلونکې ولسمشریزې ټاکنې هم اغیزمنولی شي. فیفا له قانوني لارې د رامنځته شوې ستونزې هواری اساسي حل لاره بولي، خو وړاندیز کوي، چې له هر ولایت څخه دې یو استازی انتخاب او یوه ۳۶ کسیزه کمېټه دې جوړه او د دې کمېټې د پرېکړې له مخې دې رامنځته شوې ستونزې ته دې حل لاره پیدا کړي. فیفا داسې مهال په ولسي جرګه کې د رامنځته شوي بحران په اړه اندېښنه ښيي، چې په ولسي جرګه کې لا هم پر همدې موضوع جنجال روان دی.