پخواني ولسمشر حامد کرزي ویلي، هیله لري چې امریکا د سولې په روانو هڅو کې رښتینی رول ولوبوي.
حامد کرزي له روسي رسنیو سره په مرکه کې ويلي، د سولې روانو هڅو ته افغانان ډېر لېوال دي، خو هیله لري چې د سولې په برخه کې په پوره رښتینولۍ عمل وشي او د دغې پروسې په تړاو د افغانانو له هیلو او ضرورتونو ناسمه استفاده ونه شي.
ښاغلي کرزي ویلي، د سولې په تړاو یې تر اوسه د متحده ایالتونو د نه رښتینولۍ نښې نه دي لیدلې، خو له دې اړخه ډېره اندېښنه لري چې ولې دا بهیر دومره ټکنی پرمخ ځي.
نوموړي دغه راز د سولې بهیر د چټکتیا او د افغانانو پر کلیو او بانډو د هوايي بریدونو د بندېدو غوښتنه هم کړې ده.
حامد کرزي د روسیې له یوې رسنۍ سره په ځانګړې مرکه کې ویلي: «زه هیله من چې د امریکا حکومت د افغان سولې په پروسې کې رښتینې و اوسي، د سولې له موضوع سره په رښتینولۍ برخورد وکړي، د سولې له خبرو چې د افغانانو اساسي اړتیا او ضرورت ده، ناوړه استفاده ونه کړي».
نوموړي دغه راز زیاته کړې: «موږ تر اوسه د سولې په پروسه کې د امریکا د عدم صداقت نښې نه دي لیدلې، خو د سولې روان ټکني بهیر زموږ اندېښنې ډېرې کړې دي، چې ولې دغه پروسه داسې پڅه روانه ده؟»
د افغانستان پخواني جمهور رييس یوځل بیا له بهرنیانو غوښتي، چې د ملکي او بې ګناه افغانانو د کورونو له بمبارولو لاس واخلي او ډېر ژر دغه لړۍ ودروي.
هغه ویلي، د ملکي وګړو د کورونو د بمبارولو پر ځای دې د سولې هڅې چټکې شي.
نوموړي زیاته کړې: «د خلکو په کورونو بمبارۍ دې ژر تر ژره ودرول شي او د دې پر ځای دې د سولې پر پروسې تمرکز وشي او د دغه بهیر د بریا لپاره دې هڅې ډېرې شي».
پخواني ولسمشر حامد کرزي داسې مهال د سولې روانو هڅو د چټکتیا او په دې برخه کې د امریکا پر رښتینولۍ ټینګار کړی، چې د افغان سولې لپاره د متحده ایالتونو ځانګړي استازي زلمي خلیلزاد د سیمې هېوادونو ته خپل تازه اتم سفر پیل کړی او ټاکل شوې چې تر افغانستان وروسته اماراتو او قطر ته ولاړ شي.
