۷،۳ میلیونه ماشومان له زده کړو بې برخې دي

نن د جون ۱۲ پر ماشومانو د سخت کار د مخنيوي نړیواله ورځ ده. په افغانستان کې دغه ورځ په داسې حال کې نمانځل کېږي، چې د افغانستان د کار او ټولنيزو چارو وزارت وايي، څه باندې دوه ميليونه افغان ماشومان د خپلو کورنيو د اقتصاد چلوونې له پاره په کار بوخت دي چې سم نيمايي يې سخت کارونه کوي. ددې وزارت په وينا، د جگړې او بېوزلۍ له کبله کورنۍ اړې دي چې د زده کړو پرځاى پر خپلو ماشومانو کار وکړي. د وزارت د شمېرو له مخې په افغانستان کې شاوخوا ۱۵ میلیونه ماشومان ژوند کوي چې د ټول نفوس نژدې نیمايي برخه جوړوي. ددغه وزارت ویاند عبدالفتاح احمدزی وايي، د نورو ولایتونو پرتله په کابل، بدخشان او هلمند کې ډېر ماشومان په درنو کارونو بوخت دي. یونیسیف یا د ملګرو ملتونو د ماشومانو د ملاتړ ادارې د معلوماتو له مخې افغان ماشومان نه یوازې کار کولو ته اړیستل کیږي بلکې ۳،۷ میلیونه یې له زدکړو هم بې برخې دي. دې ادارې افغانستان کې د ماشومانو وضعیت د اندېښنې وړ دی.