د غزنین کلا یو برج نړېدلی دی

په غزني کې د بارانونو له کبله د (غزنین) تاریخي کلا یو برج نړېدلي دی. د غزني د والي ویاند محمد عارف نوري وایي، چې د تېرې جمعې په ورځ باران ددې برج پاسنۍ برخه نړولې وه، چې بیا د سه شنبې په ورځ د نم له کبله ددې برج نورې برخې هم وېجاړې شوې دي او د برج اصلي جوړښت له منځه تللی دی. نوري وایي، د برج د نړېدو اصلي لامل تاریخي او کلتوري اثارو ته نه پاملرنه ده. دی وایي ددې برجونو د بیا رغونې هڅې یې پیل کړې دي، خو تر اوسه یې کارونه په عملي ډول نه دي پیل شوي. د غزنین کلا دېوال چې بالا حصار یې هم را چاپېر کړی دی ۲۶ برجونه لري، چې په ځینو برخو کې یې خلک هم ژوند کوي. ځایي اوسېدونکې وایي، که د دې برجونو او کلا د بیا رغونې چارې پیل شي او دوی ته د اوسېدو نمرې ورکړل شي نو له دې ځایه به کډې وکړي.