“امنیت او عدالت” ټاکنیز ټیم،: ټاکنیز کمېسیونونه د ارګ د لاس آلې ګرځېدلې دي

د “امنیت او عدالت” ټاکنیز ټیم، حکومت د رڼو او عادلانه ټاکنو ترسره کولو لپاره د ارادې پر نه شتون تورن کړی او ادعا کوي چې ټاکنیز کمېسیونونه د حکومت مشرتابه د لاس پر اله بدل شوي دي. د ولسمشرۍ لپاره نوماند د رحمت الله نبیل ډلې د اعلاميې په خپرولو سره ادعا کړې، ولسمشر غني چې د راتلونکو ټاکنو لپاره هم نوماند دی، د قانون او ډیموکراسۍ د اصل خلاف پرېکړې کوي او په دې سره د رڼو ټاکنو ترسره کولو لپاره فرصتونه له منځه وړي. نوموړي د جزئیاتو له ورکولو پرته ادعا کړې چې د قانون خلاف، د ټيټې کچې اداري واحدونو لکه ولسوالانو، ښاروالانو، امنیه قوماندانانو، د وزارتونو مرستیالانو او د سرپرست وزیرانو ګومارنې ټول د راتلونکو ټاکنو مهندسۍ لپاره د ولسمشر په ګټه ترسره کېږي. خو د ولسمشرۍ ویاند شاه حسین مرتضوي څه موده وړاندې د ولسمشر له لوري پر وروستیو ګومارنو د نیوکو په غبرګون کې ویلي وو چې د ولسمشر ټول اقدامات د قانون په رڼا کې ترسره شوي او څوک چې دا ډول تورونه لګوي، ښه به وي چې ثبوت وړاندې کړي. دغه ټیم ګواښ کوي چې د ((بي عدالتۍ، قانون ماتونې او قانون ته نه درناوي او له درغلیو ډکو ټاکنو)) پر وړاندې به ودرېږي.