دفاع وزارت: د تخار خواجه غار ولسوالي بیرته امنیتي ځواکونو نیولې ده

امنیتي ځواکونو د یو لړ عملیاتو په پایله کې د تخار خواجه غار ولسوالي بیرته تر خپل واک لاندې راوستې ده. له دفاع وزارته په خپرې شوې خبرپاڼه کې راغلي چې یاده ولسوالي یې تېره شپه د یو لړ تصفیوي عملیاتو په ترڅ کې د طالبانو له منګولو ازاده کړې ده او اوس د امنیتي ځواکونو په لاس کې ده. خبرپاڼه زیاتوي، د دې ولسوالۍ وضعیت وروسته له څو ساعته جګړې بیرته عادي شوی دی. د خبرپاڼې له مخې په دې عملیاتو کې ۱۹ وسله وال طالبان وژل شوي او ۱۲ نور ټپیان دي. دفاع وزارت پر یاده ولسوالي د امنیتي ځواکونو د کنټرول خبره په داسې حال کې کوي چې دوه ورځې وړاندې طالبانو د همدې ولسوالۍ د نیولو ادعا کړې وه. یادې ډلې تر اوسه په دې اړه څه نه دي ویلي.