د سينهوا خبري اژانس د خبر له مخې، د چين د دولت رئيس شي جين پينګ د جون په ۱۳ مه نېټه په بېشکيک کې د افغانستان له ولسمشر محمد اشرف غني سره وکتل.
شي جين پينګ اشرف غني ته د افغانستان د خپلواکۍ د ۱۰۰ مې کاليزې د راسېدو په پار مبارکي وويله او هيله يې وښودله چې په افغانستان کې سوله، ثبات او پرمختګ ژر راشي. نوموړي په خپلو خبرو کې دې ته اشاره وکړه چې چين او افغانستان لرغوني دوستانه ګاونډيان او ستراتېژيک همکاران دي. چين به له افغانستان سره يوځای د يو کمربند او يوې لارې په چوکاټ کې په بېلابېلو برخو کې خپلمنځي متقابلې ګټورې همکارۍ پياوړې کړي، اقتصادي او سوداګريزې همکاريزې پروژې به پرمخ يوسي او د ګډو ګټو پربنسټ به د دواړو هېوادونو د تصديو له ګډو همکاريو څخه ملاتړ وکړي. چين به د پخوا په شان له افغانستان سره په دغه هېواد کې د امن او ثبات د راوستلو او ترهګرۍ ضد مبارزې په برخو کې مرستې وکړي او هيله لري چې افغانستان د ختيځ ترکمنستان غورځنګ ضد مبارزې په برخه کې له چين څخه ټينګ ملاتړ ته ادامه ورکړي.
شي جين پينګ په خپلو خبرو کې پر دې ټينګار وکړ چې چين د افغانستان د سولې او روغې جوړې له هغه جامع بهير څخه ملاتړ کوي چې د افغانانو په مشرۍ او حاکميت ترسره شي او له بېلابېلو لارو چارو به د افغانستان د سولې او د بين الافغاني خبرو اترو لپاره هڅې او مرستې برابرې کړي. چين د افغانستان او پاکستان د اړيکو له ښه والي څخه ملاتړ کوي او درې اړخيزې همکارۍ به پراخې کړي.
اشرف غني شي جين پينګ ته د نوي چين د ۷۰ مې کاليزې مبارکي وويله او څرګنده يې کړه چې چين د انسانانو د ګډ برخليک ټولنې د جوړولو وړانديز کړی او د اقتصاد د نړيوال کېدو له بهير څخه يې ملاتړ کړی چې دا په روانې ۲۱ مې پېړۍ کې د نويو نړيوالو اړيکو د جوړولو ښه نمونه ده. افغانستان د سولې او روغې جوړې بهير او د سيمه ييزې سولې او ثبات د هڅولو په برخو کې د مثبت رول لوبولو په پار له چين څخه مننه کوي، افغانستان به خپل پرمختيايي پلان له يو کمربند اويوې لارې سره پيوند کړي او د دواړو هېوادونو د اقتصادي او سوداګريزو اړيکو د لانږدېدو لپاره به هڅې وکړي.
