د تاجکستان ولسمشر: په افغانستان کې امن او ثبات زموږ لپاره ډیر مهم دی

ولسمشر غني د شانګهای همکاریو سازمان د غړو هیوادونو د مشرانو ناستې په څنډه کې نن سهار د تاجکستان له ولسمشر امام علي رحمان سره وکتل. په دې کتنه کې دواړو لورو د افغانستان او تاجکستان تر منځ د امنیتي، اقتصادي او فرهنګي همکاریو د لا پراختیا، افغان سولې، کاسا زر پروژې، د افغانستان له لارې د برېښنا د لېږد او د اورګاډي پټلۍ په اړه بحث او خبرې وکړې. ولسمشر غني د برېښنا او انرژۍ د لېږد په برخه کې د افغانستان ظرفیت ته په اشارې وویل، افغانستان جنوبي اسیا ته د منځنۍ اسیا د انرژۍ د لېږد اسانه مسیر او په دې برخه کې هر ډول همکارۍ ته چمتو دی. د تاجکستان ولسمشر وویل، د دوستانه اړیکو او اوږد سرحد لرلو له امله د افغانستان امنیت او ثبات زموږ لپاره مهم دی. هغه زیاته کړې، هیواد یې د افغانانو په رهبرۍ او مالکیت د سولې پروسې د ملاتړ ترڅنګ په بېلابېلو برخو کې دوستانه همکاریو ته چمتو دی.